Ադրբեջանական Day.az կայքի հաղորդմամբ, Ադրբեջանում ԱՄՆ դեսպան Մեթյու Բրայզան անդրադարձել է հայկական լրատվամիջոցների տարածած այն տեղեկատվությանը, ըստ որի` Ամերիկայի Հայ դատի հանձնախումբը (ANCA) լայնամասշտաբ կամպանիա է ձեռնարկել Սենատի լիագումար նիստում Բրայզայի թեկնածության հաստատումը խափանելու համար:
«ԱՄՆ-ը ժողովրդավարական երկիր է, և յուրաքանչյուր ոք կարող է արտահայտել իր մոտեցումը: Միևնույն ժամանակ, ճիշտ չեն հայկական սփյուռքի կողմից իմ հասցեին հնչեցրած տեղեկությունները: Սակայն կրկնում եմ` յուրաքանչյուրը կարող է արտահայտել իր կարծիքը:
Ես չգիտեմ, թե երբ տեղի կունենա Սենատի նիստը, ուր կքննարկվի իմ նշանակման խնդիրը: Ինձ համար կարևորն այն է, որ ես կարող եմ ներկա գտնվել դրանում և պաշտպանել ինձ»,- ասել է Բրայզան:
Հիշեցնենք, որ 2010 թվականի դեկտեմբերի 30-ին ԱՄՆ նախագահ Բարաք Օբաման, օգտվելով Կոնգրեսի արձակուրդում գտնվելու հանգամանքից, Բրայզային նշանակեց Ադրբեջանում ԱՄՆ դեսպանի պաշտոնում:
Ի դեպ, Օբաման նրան Ադրբեջանում ԱՄՆ դեսպանի պաշտոնում նշանակել էր դեռևս 2010 թվականի մայիսին: Ապա դա հաստատել էր Սենատի Արտաքին հարաբերությունների հանձնաժողովը, սակայն հայամետ սենատոր Բարբարա Բոքստերի ջանքերով, ով դարձյալ վերընտրվել է Սենատում, Բրայզայի թեկնածությունը քվեարկության չդրվեց Սենատի լիագումար նիստում և հանվեց օրակարգից:
Եթե Սենատը մինչև հաջորդ նստաշրջանի ավարտը (այս տարվա նոյեմբեր-դեկտեմբեր) չհաստատի Մեթյու Բրայզայի (ինչպես նաև Օբամայի կողմից Թուրքիայում ԱՄՆ դեսպան նշանակված Ֆրենսիս Ռիկարդոնեի) թեկնածությունը, ապա Օբամայի հրամանը կհամարվի ուժը կորցրած: