Ադրբեջանական Apa լրատվական գործակալության հաղորդմամբ, պաշտոնական այցով Անկարայում գտնվող Ադրբեջանի պաշտպանության նախարար Սաֆար Աբիեևը հանդիպում է ունեցել իր թուրք գործընկեր Մեհմեդ Վեջդի Գյոնյուլի հետ: Վերջինս լրագրողներին հայտնել է, թե ինչ խնդիրներ են իրենք քննարկելու.
«Մենք քննարկելու ենք փոխադարձ հետաքրքրություն ներկայացնող մի շարք հարցեր և, մասնավորապես, ղարաբաղյան հակամարտության կարգավորման խնդիրը: Մեր քննարկման առաջնային պլանում են գտնվելու նաև ռազմական արդյունաբերությանը, ռազմական ուսուցմանը և զորվարժություններին մասնակցելուն առնչվող խնդիրները»:
Սաֆար Աբիևն իր հերթին նշել է. «Մենք շնորհակալ ենք Թուրքիային` բոլոր ոլորտներում Ադրբեջանին աջակցելու համար: Ադրբեջանի և Թուրքիայի միջև գոյություն չունեն տարաձայնություններ: Հանդիպման ժամանակ մենք մեծ կարևորություն ենք տալու ղարաբաղյան հիմնախնդրի կարգավորմանը:
Մենք անգամ «մի թիզ» հող չենք զիջի Հայաստանին: Անհրաժեշտ պահին մոբիլիզացնելով ուժերը` Ադրբեջանը «կազատագրի իր տարածքները»: Մենք չենք հրաժարվի մեր խոսքերից: Հայաստանի զինված ուժերը, առանց որևէ պայման առաջադրելու, «պետք է» հեռանան «ադրբեջանական» տարածքներից»:
Հիշեցնենք, որ մարտի 10-ին թուրքական խորհրդարանը վավերացրեց 2010 թվականի օգոստոսի 16-ին կնքված և դեկտեմբերի 22-ին Ադրբեջանի խորհրդարանի կողմից վավերացված թուրք-ադրբեջանական ռազմավարական գործընկերության և փոխօգնության մասին պայմանագիրը, իսկ մարտի վերջին էլ Թուրքիայի նախագահ Աբդուլլահ Գյուլն իր ստորագրությամբ հաստատեց այն: