Ամերիկացի աստղագետները տիեզերքում արձանագրել են աստղի հզոր պայթյուն, որը հայտնվել է «սև խոռոչում»: Սովորաբար այդպիսի պայթյունից առաջացած գամմա-ճառագայթումը տևում է մինչև երկու ժամ: Սակայն ռադիոակտիվության տատանումները շարունակվում են արդեն մեկ շաբաթ: Այս մասին հաղորդել է Associated Press գործակալությունը` հղում անելով NASA-ին:
Պայթյունն արձանագրել է ամերիկյան NASA տիեզերական գործակալությունը Swift արբանյակի միջոցով մարտի 28-ին: Գիտնականները նշում են, որ տատանումները չեն դադարում: Հիմա այդ երևույթն ուսումնասիրվում է Hubble աստղադիտակի և Chandra տիեզերական դիտարանի միջոցով:
Գիտնականները նշում են, որ պայթել է աստղ, որը առավելագույնս մոտ է գտնվել հսկայական «սև խոռոչին»: Նրանց հետաքրքրել է և զարմացրել պայթյունի ազդեցության տևողությունը, ինչը կարող է նշանակել, որ տեղի են ունենում նախկինում չարձանագրված և չուսումնասիրված երևույթներ:
Գալակտիկան, որտեղ արձանագրվել են այս երևույթները, գտնվում է երկրագնդից 3.8 մլրդ լուսային տարի հեռավորության վրա: