Հայ ազգային կոնգրեսի համակարգող Լեւոն Զուրաբյանը մամուլի ասուլիսի ժամանակ կոչ արեց լրագրողներին հանդես գալ ի պաշտպանություն «Հայկական ժամանակ» օրաթերթի գլխավոր խմբագիր, քաղբանտարկյալ Նիկոլ Փաշինյանի, որի նկատմամբ վերջին օրերին իշխանությունները ստոր հաշվեհարդար են տեսնում: Նա դա բնութագրեց որպես ռեժիմի վախի դրսեւորում բոլոր այն մարդկանց նկատմամբ, որոնք անգամ ամենածանր պայմաններում շարունակում են պայքարել: ՀԱԿ համակարգողը տեղեկացրեց, որ երբ իրենք իրազեկվեն, թե որտեղ է կայանալու ԵՄ-Հայաստան մարդու իրավունքներին նվիրված համաժողովը, այն ժամանակ էլ իրենք կորոշեն, թե ինչպես են անցկացնելու ավանդական վեցժամյա պիկետը: Նա ասաց, որ այդ պիկետը նոյեմբերի 9-ին կայանալու է «Երեւան» հյուրանոցի մոտ: Լեւոն Զուրաբյանը հիշեցրեց, որ նույն օրը Հայ ազգային կոնգրեսը որոշել է անցկացնել հանրահավաք, որի նպատակն է միջազգային հանրությանը տեղյակ պահել Հայաստանում մարդու իրավունքների վիճակի մասին: Բնութագրելով այսօրվա իշխանությունների վիճակը` Լեւոն Զուրաբյանը հայտարարեց, որ օղակը ռեժիմի շուրջ սեղմվում է: Որպես փաստարկ` ՀԱԿ համակարգողը նշեց, սոցիալ-տնտեսական իրավիճակն օր օրի վատթարանում է, իսկ կապիտալի փախուստը մոտենում է մեկ ու կես միլիարդ դոլարի: Իսկ դա, ըստ Լեւոն Զուրաբյանի, ցույց է տալիս, որ ռեժիմը չի հավատում իր ապագային: Լեւոն Զուրաբյանը նշեց, որ ըստ պաշտոնական տվյալների՝ եթե 2008 թ. Հայաստանից արտագաղթել է քսաներեք հազար մարդ, 2009 թ.` քսանհինգ հազար մարդ, ապա այս տարվա ինն ամիսների ընթացքում` վաթսուն հազար մարդ:
