Այսօր Նասիմինի շրջանային դատարանը լրագրող Խադիջա Իսմաիլովայի կալանքի ժամկետը երկարաձգել է մինչև մայիսի 24-ը: Այս մասին Turan-ին հայտնել է նրա փաստաբան Ֆարիզ Նամազլին:
Հիշեցնենք՝ Իսմաիլովան ձերբակալվել է 2014 թ. դեկտեմբերի 5-ին ինքնասպանության հասցնելու մեղադրանքով:
Սակայն փետրվարի 13-ին դատախազությունը նրան մեղադրել է նաև խոշոր չափի գումարի հափշտակման, խոշոր եկամտի ստացմամբ անօրինական ձեռնարկատիրության և պաշտոնեական լիազորությունների չարաշահման համար, ինչը հանգեցրել է ծանր հետևանքների:
Հետաքննությունն Իսմաիլովային կալանքի տակ պահելը հիմնավորում է նրանով, որ վերջիս կարող է ճնշում գործադրել վկաների վրա և խույս տալ հետաքննությունից: Հետաքննության երկարաձգումը հիմնավորվում է նաև լրացուցիչ փորձագիտական եզրակացություններ ստանալու անհրաժեշտությամբ:
Իսմաիլովան մեղադրանքներն անվանել է անհեթեթ և հերքել է դրանք:
Փաստաբան Նամազլին չի բացառել, որ դատարանի վճիռը կբողոքարկվի:
