Ադրբեջանական APA լրատվական գործակալության հաղորդմամբ, Ադրբեջանի Միլլի մեջլիսի (խորհրդարան) անդամները Բաքվում ամերիկյան դեսպան Մեթյու Բրայզային մեղադրել են հայամետ դիրքորոշում ունենալու մեջ, ինչի պատճառը Ստեփանակերտի օդանավակայանի պատմության հետ կապված Բրայզայի արձագանքն է:
Պատգամավոր Ազայ Գուլիևը հայտարարել է, որ ադրբեջանական կողմը համարժեք պատասխան է տվել հայկական կողմին, ինչը չի կարելի ասել Ադրբեջանում ԱՄՆ-ի դեսպան Մեթյու Բրայզայի մասին.
«Ընդհակառակը, Բրայզան իր հայտարարության մեջ փորձել է զուգահեռներ անցկացնել Երևան-Ստեփանակերտ և Բաքու-Նախիջևան ավիաչվերթների միջև` հավասարության նշան դնելով դրանց միջև: ԱՄՆ վարչակազմի ներկայացուցիչներն իրենց հայտարարություններում չպետք է նմանատիպ սխալներ գործեն»:
Պատգամավոր Էլման Մամեդովն էլ իր հերթին նշել է, որ այդ օդանավակայանը, ըստ էության, գտնվում է ոչ թե Ստեփանակերտում, այլ` «օկուպացված» տարածքում` Իվանյանում (Խոջալու). «Հայերը, «ընդլայնելով» Իվանյանում գոյություն ունեցող օդանավակայանը, ցանկանում են դա ներկայացնել որպես միջազգային մակարդակի օդանավակայան»:
Սակայն ամենախիստ դիրքորոշումը ցուցաբերել է պատգամավոր Ֆազաիլ Աղամալին, որը Բրայզային մեղադրել է հայամետ դիրքորոշում ունենալու մեջ. «Ցայժմ Բրայզան իր վրայից չի հանել «հայամետ» համազգեստը: Կարծում եմ, որ Բրայզան պետք է հետևի իր մեկնաբանություններին»:
Հիշեցնենք, որ այն բանից հետո, երբ հայտնի դարձավ, որ հայկական կողմը պատրաստվում է ավիաչվերթներ կազմակերպել Երևանից Ստեփանակերտ, ադրբեջանական կողմը սպառնաց կործանել քաղաքացիական ինքնաթիռները, ինչը Բրայզայի կողմից որակվեց որպես անընդունելի վարք:
Բրայզան ադրբեջանական կողմին նաև հիշեցրեց, որ Բաքու-Նախիջևան ավիաչվերթն էլ իրականացվում է Հայաստանի օդային տարածքով: