Ադրբեջանի կապի նախարության եւ միջազգային Arianespace կազմակերպության միջեւ պայմանագիր է ստորագրվել Azerspace արբանյակն ուղեծիր դուրս բերելու վերաբերյալ. այս մասին տեղեկացնում է ադրբեջանական Trend գործակալությունը:
Պայմանագրի արժեքը 93 միլիոն դոլար է: Արբանյակը տիեզերք բաց կթողնվի 2012 թվականին: Հայտարարված մրցույթին մասնակցել էին` ILS, Arianespace, SpaceX եւ «Ուկրօբորոնսերվիս» կազմակերպությունները: Arianespace իրականացնում է հրթիռների եւ կրող հրթիռների արտադրություն: Azerspace արբանյակի արտադրող է հանդես գալիս ամերիկյան Orbital Sciences Corporation, իսկ ուղեծրային դիրքը, որի վրա կտեղակայվի արբանյակը, վարձակալել է մալայզիական օպերատոր MEASAT-ը: Ադրբեջանական Azerspace արբանյակ նախատեսված է թվային հեռուստառադիո ծառայությունների տրամադրման, համացանցի միացման, տվյալների փոխանակման, ինչպես նաեւ կառավարական կապի համար: Azerspace-ի սպասարկման տարածքը կընդգրկի Եվրոպան, Կենտրոնական Ասիան եւ Աֆրիկան:
