Վրացական Apsny.ge կայքիհաղորդմամբ,Վրաստանի ազգային բանկի արժութային պաշարները հասել են իրենց պատմական բարձրակետին: Մարտի 31-ի դրությամբ դրանք կազմել են 2,718 միլիարդ ամերիկյան դոլար:
Վրաստանի Ազգային բանկի ներկայացուցիչները նշում են, որ դա 198,3 միլիոն դոլարով ավելի է, քան նախորդ ամսվա ցուցանիշը: Ի դեպ, 2009 թվականին Վրաստանի արժութային պաշարները կազմել են 2,110 միլիարդ դոլար, իսկ նախորդ տարի` 2,265 միլիարդ դոլար:
Վրաստանի Ազգային բանկի արժութային պաշարները համալրվել են Արժույթի միջազգային հիմնադրամի (ԱՄՀ) վարկերի, ինչպես նաև 2008 թվականին ռուս-վրացական պատերազմի հետևանքների հաղթահարման նպատակով Վրաստանին ցուցաբերվող ֆինանսական աջակցության հաշվին:
Ռուս-վրացական պատերազմի ժամանակ Վրաստանի արժութային միջոցներն առավելագույն անկում էին ապրել` նվազելով մինչև 1,123 միլիարդ դոլարը:
Նշվում է, որ Վրաստանի Ազգային բանակի արժութային պաշարները ցածր ռիսկեր պարունակող արժեթղթերի տեսքով պահվում են բարձր վարկանիշ ունեցող բանկերում, ինչպես նաև ԱՄՀ հաշիվներում: Այդ պաշարների 70 տոկոսը ներկայացված է դոլարի տեսքով, իսկ 30 տոկոսը` եվրոյի տեսքով:
Հիշեցնենք, որ ռուս-վրացական հնգօրյա պատերազմից հետո ԱՄՆ-ը հայտարարեց դրա հետևանքների վերացման կապակցությամբ Վրաստանին 1 միլիարդ դոլար տրամադրելու մասին, իսկ ԱՄՀ-ը խոստացավ երեք տարիների ընթացքում Վրաստանին տրամադրել 750 միլիոն դոլար:
