Սյունիքի Բռնակոթ համայնքում հացահատիկի բերքը անցած տարի շատ վատ է եղել, և գյուղացիները ուշացնում են վարկերի մարումները: Այս մասին «Առաջին լրատվական»-ին հայտնեց համայնքի ղեկավար Ատոմ Առաքելյանը: Նրա խոսքով՝ պատճառը նաև անասունների շրջանում տարածված հիվանդություններն էին, որոնց հետևանքով չկարողացան նաև անասունները վաճառել:
Բռնակոթում ևս, գյուղացիները նոր վարկով հին վարկերն են մարում, իսկ պետական սուբսիդավորվող վարկերից բացի, մնացածը 24% տոկոսադրույքով են տրամադրվում: Եվ գյուղացին ստիպված է դրանք վերցնել՝ գյուղ.աշխատանքները ժամանակին իրականացնելու համար:
Ա. Առաքելյանը պատմեց, որ վարկերը մարել չկարողանալու հետևանքով մի քանի գյուղացիների հողակտորներ բանկերն առգրավել են: Իսկ 3-4 գյուղացիներ էլ «սեփական կամքով» են հողը հետ տվել՝ ի զորու չեն եղել այն մշակել:
«Հողը մշակել չկարողանալու, վարկերի պատճառով գյուղացիք գնում են գյուղից: Արդեն 70 ընտանիքներ հեռացել են, գյուղում 80 ծուխ է մնացել»,- ասաց Ա. Առաքելյանը:
Նշենք, որ ըստ պաշտոնական տվյալների՝ Բռնակոթում գյուղատնտեսությամբ զբաղվում է 683 գյուղացիական տնտեսություն:
