Վրացական Apsny.ge կայքի հաղորդմամբ, Իսրայելի Ազգային անվտանգության խորհրդի կազմի մեջ գտնվող ահաբեկչության դեմ պայքարի շտաբը երեկ հայտարարություն է տարածել, ըստ որի` իր համաքաղաքացիներին կոչ է անում հրեական Պեսահ (գարնան/ազատության) տոնի նախաշեմին զերծ մնալ Վրաստան ու Հայաստան այցելելուց: Այդ երկրներում «գոյություն ունի կոնկրետ» վտանգ, որ իսրայելցիները կարող են առևանգվել «Հիզբոլլահ»-ի կամ ՀԱՄԱՍ-ի ահաբեկիչների կողմից:
Վտանգավոր երկրների թվում են ընդգրկվել նաև հետխորհրդային երկու հանրապետություններ` Ադրբեջանն ու Տաջիկստանը, իսկ Թուրքմենստանը ներկայիս դրությամբ հանվել է այդ ցուցակից:
Վրացական լրատվամիջոցներն Իսրայելի այս քայլը պայմանավորում են
Վրաստանում հրեա երկու գործարարների ձերբակալությամբ:
Հիշեցնենք, որ փետրվարի 11-ին Վրաստանն ու Հայաստանն արդեն համարվել էին այնպիսի երկրներ, ուր իսրայելցիներին կարող էր վտանգ սպառնալ: Փետրվարի 24-ին Վրաստանը հանվել էր այդ «սև ցուցակից»: