Վրացական Apsny.ge կայքի փոխանցմամբ, Վրաստանի գլխավոր դատախազության հակաճգնաժամային դեպարտամենտի ներկայացուցիչները ձերբակալել են թուրք գործարար Յաման Չաղաթային:
Հետաքննությունը պարզել է, որ 2008 թվականին թուրք գործարարը Վրաստանի պետբյուջեից ստացել է 1.955.000 լարի կազմող արտոնյալ պայմաններով վարկ` կոնկրետ նախագիծ իրականացնելու համար: Խոսքը Քոբուլեթիի շրջանի Խուցուբանի գյուղում ցիտրուսների վերամշակման գործարանի կառուցման մասին է, որում պետք է աշխատանքի տեղավորվեին Վրաստանի 300 քաղաքացիներ:
Սակայն Չաղաթայը չի կատարել իր պարտավորությունները և յուրացրել է 1.2 միլիոն լարի: Ցիտրուսների վերամշակման գործարանի փոխարեն, Չաղաթայը կառուցել է մրգերի վերամշակման գործարան և աշխատատեղեր չի ստեղծել:
Այժմ թուրք գործարարը մեղադրվում է պետությունից ստացած վարկի աննպատակահարմար օգտագործման եղանակով ապօրինի եկամուտների օրինականացման և մաքսային փաստաթղթերի կեղծման մեջ: Նրան սպառնում է մինչև 12 տարվա ազատազրկում:
Հիշեցնենք, որ իսրայելցի գործարարներ Ռոնի Ֆուքսն ու Զեև Ֆրենկելը ձերբակալվել էին 2010 թվականի հոկտեմբերի 14-ին Բաթում քաղաքում: Նրանք մեղադրվում էին Վրաստանի ֆինանսների փոխնախարար Ավթանդիլ Խարաիձեին 7 միլիոն դոլար կաշառք տալու մեջ:
Ապրիլի 1-ին Թբիլիսիի դատարանը իսրայելցի գործարարներ Ռոնի Ֆուքսին և Զեև Ֆրենկելին մեղավոր ճանաչեց պաշտոնատար անձին կաշառելու փորձի համար:
Ֆուքսը դատապարտվեց 7 տարվա ազատազրկման և 500,000 վրացական լարի (295,000 ամերիկյան դոլար) տուգանքի, իսկ Զեև Ֆրենկելը` 6.5 տարի ազատազրկման ու 100,000 վրացական լարի (60,000 ամերիկյան դոլար) տուգանքի: