Վրացական Georgiatimes.info կայքի փոխանցմամբ, քառօրյա այցով Թուրքիա է ժամանել Աբխազիայի նախագահ Սերգեյ Բաղապշը: Վերջինս արդեն հանդիպում է ունեցել Թուրքիայում աբխազական համայնքի ներկայացուցիչների հետ:
Վերջիններս հանդիպման ժամանակ գոհունակություն են հայտնել, որ Աբխազիայի ինքնիշխանության ճանաչումն արդեն իրողություն է` դրա համար շնորհակալություն հայտնելով Ռուսաստանին: Նրանք նաև հավելել են, որ ուշադիր հետևում են ռուս-աբխազական հարաբերությունների զարգացմանը և կցանկանային, որ նմանատիպ հարաբերություններ հաստատվեին Աբխազիայի ու Թուրքիայի միջև:
Բացի աբխազական համայնքի ներկայացուցիչների հետ հանդիպումից, Բաղապշը պլանավորել է նաև հանդիպումներ անցկացնել թուրք գործարարների հետ` հետագա համագործակցության հնարավորությունները քննարկելու համար:
Բաղապշն իր հերթին նշել է, որ, դժբախտաբար, նախկինում չի կարողացել գալ Թուրքիա` դա բացատրելով մի շարք օբյեկտիվ հանգամանքներով: Բաղապշը նաև շնորհակալություն է հայտնել թուրքական իշխանություններին` վաղուց պլանավորած այցի իրականացման հնարավորություն ընձեռելու համար:
Հիշեցնենք, որ Թուրքիայում բնակվում են 500.000-700.000 աբխազներ, որոնց նախնիները հիմնականում Թուրքիա (Օսմանյան կայսրություն) են գաղթել 1864-1878 թվականներին: