Հայաստանի Հանրապետությունում փետրվարի 18-ին կայանալիք նախագահական ընտրությունների քարոզարշավը մտել է եզրափակիչ փուլ: Համաձայն The Gallup-ի անցկացրած վերջին հարցումների՝ պետության գործող ղեկավարիհետ, որին աջակցում է ընտրողների 66 տոկոսը, չի կարող մրցակցել և ոչ մի թեկնածու: Թե ի՞նչ կարող է սպասել Ռուսաստանն ու մնացած աշխարհը վերընտրվել պատրաստվող ՀՀ նախագահից, այդ մասին Սերժ Սարգսյանըպատմել է«Օգոնյոկին»-ին։
-Ձեր կարծիքով՝ ինչպիսի՞ն է Լեռնային Ղարաբաղի խնդրի լուծման հեռանկարը:
-Ղարաբաղցիները պետք է իրենք որոշեն, թե ինչպիսի քաղաքական կարգավիճակով ապրեն ապագայում: Դա ինքնորոշման համար պայքարի դասական օրինակ է, և չկա ոչ մի փաստարկ, որը կկարողանա բացատրել, թե ինչո՞ւ պետք է Արցախի ժողովրդին մերժվի այդ իրավունքը: Մնացած բոլոր հարցերն ածանցյալ են:
Էապես կարևոր է ամրապնդել մեր տարածաշրջանում սպառազինության նկատմամբ արդյունավետ վերահսկողության միջազգային մեխանիզմները: Ադրբեջանը, հանդիսանալովՄԱԿ-ի Անվտագության խորհրդի ոչ մշտական անդամ, գործնականում սանձազերծել է սպառազինությունների մրցավազքը և բացեիբաց խախտում է Եվրոպայում սովորական զինված ուժերի մասին պայմանագրի իր պարտավորությունները:
Մենք շարունակում ենք բանակցություններն Ադրբեջանի հետ: Սակայն նման իրավիճակում բեկում ակնկալելն իրատեսական չէ:Բոլորը, ովքեր զբաղվում են այդ խնդրով և´ Մոսկվայում, և´ Վաշինգտոնում, և´ Փարիզում (թվարկված քաղաքները հանդիսանում են Մինսկի խմբի համանախագահների երկրների մայրաքաղաքները.-1in.am), հիանալի գիտեն, թե ում մեղքով է, որ մինչ օրս լուծում չի գտնվել:Նրանք հիանալի հիշում են, թե ով է ձախողել բանակցությունները Քի-Վեսթում և Կազանում: Եվ նրանք գիտեն, որ խնդրի էությունը Լեռնային Ղարաբաղի ինքնապաշտպանական ուժերի կողմից հարակից տարածքների նկատմամբ վերահսկողության մեջ չէ, հետևաբար՝ խնդրի լուծումը կախված չէ դրանք վերադարձնելուց:
–Իսկ ի՞նչ կարող է անել Ռուսաստանը, որպեսզի ղարաբաղյան խնդիրը գոնե նվազեցնի իր պայթյունավտանգ լինելը:
-Ռուսաստանը Ֆրանսիայի և ԱՄՆ-ի հետ այս հակամարտությունում կարևոր միջնորդ է: Միայն ռուսական միջնորդության շնորհիվ հաջողվեց 1994 թվականին հրադադար կնքել:
Լուրջ հույսեր էին կապվում վերջերս ցուցաբերված բարձր մակարդակով ռուսական միջնորդության հետ: Սակայն, ավաղ, Ադրբեջանը տորպեդահարեց այդ գործընթացը՝ մշտապես հանդես գալով նոր ուղղումներով ու փոփոխություններով արդեն գրեթե համաձայնեցված փաստաթղթի վերաբերյալ: Ես երախտապարտ եմ Ռուսաստանի բարձրագույն ղեկավարությանը հակամարտության լուծման ուղիների որոնման մեջ հետևողական և անձնական մասնակցության համար: Համոզված եմ, որ այդ մասնակցությունը բանակցային ձևաչափերին զգալիորեն սառեցնում է շատ տաք գլուխներ:
-Ավելի իրատեսական է դառնում Հայաստանի երկաթուղային ապաշրջափակումը՝ Աբխազիայի տարածքով ճանապարհի բացումը: Ի՞նչ է դա նշանակում երկրի համար:
-Շրջափակման ճեղքումը մեզ համար մեծ գործ կլինի: Առաջին հերթին՝ տնտեսության համար: Փոխադրման հնարավորության բացակայության կամ փոխադրման թանկ արժեքի պատճառով ներկայումս մեր որոշ ապրանքներ պարզապես անմրցունակ են: Իհարկե, անհրաժեշտ է քառակողմ համաձայնություն, սակայն վերջերս մեզ այցելել էր Վրաստանի վարչապետ Իվանիշվիլին, և նա ինձ վստահեցրեց, որ Վրաստանի համար երթևեկության բացումը նույնպես շահավետ է:
-Իրանն այսօր Հայաստանի գլխավոր առևտրային գործընկերներից մեկն է: Ինչպե՞ս եք դուք վերաբերվում այն երկրի հետ հարաբերություններին, որի դեմ, փաստացի, ողջ աշխարհը շրջափակում է հայտարարել:
-Դուք նկատի ունեք պատժամիջոցնե՞րը, որոնք Իրանի դեմ սահմանել է ՄԱԿ-ի Անվտանգության խորհուրդը:Դժվար թե դա կարելի լինի կոչել ամբողջական շրջափակում: Հայաստանը գործում է բացառապես միջազգային իրավունքի շրջանակում: Պատժամիջոցներ, անշուշտ, կան:Դրանք հարվածում են իրանական տնտեսությանն ու անդրադառնում մեր տնտեսության վրա:Սակայն մենք շարունակում ենք հետաքրքիր համատեղ նախագծերի մշակումը, մասնավորապես՝ հիդրոէներգետիկայի ոլորտում: Ներկայումս ինտենսիվ կերպով իրականացվում են Հայաստանն ու Իրանը միմյանց կապող միջազգային ավտոճանապարհի շինաշխատանքները, հաջորդը՝ երկաթուղային նախագիծն է: