Տարեվերջին Կենտրոնական բանկը գործող և նոր բացվող բանկերի համար նոր նորմատիվ ընդունեց՝ բանկի ընդհանուր կապիտալի նվազագույն չափը սահմանվեց հինգ մլրդ դրամ, նոր ստեղծվող բանկերի համար՝ երեսուն մլրդ դրամ: Բանկերի խոշորացման թեման նորից դարձավ արդիական:
«Առաջին լրատվական»-ի հետ զրույցում բանկային համակարգին ծանոթ տարբեր մասնագետներ տեսակետներ հայտնեցին, որ ստեղծված պայմաններում այս գործընթացն անխուսափելի է: Բանկերի խոշորացումը նոր բանկերի միջև նոր մրցակցություն կառաջացնի, որից դեռ դժվար է ասել՝ ինչ օգուտներ կունենա հասարակ քաղաքացին: Գործընթացը ենթադրում է աստիճանական անցում:
«Առաջին լրատվական»-ի հետ զրույցում ԿԲ խորհրդի նախկին անդամ Ահարոն Չիլինգարյանը նկատեց, որ ինչքան բանկային համակարգն օպտիմալացվի, այնքան գործընթացից շահած կլինենք: Նրա խոսքով՝ բանկերի միաձուլումն ունի իր և´ լավ, և´ վատ կողմերը: Բանկերը կդառնան ուժեղ, վերահսկողությունը կլինի հասցեական, բանկերի մոնիթորինգի համար վարչական միջոցները կկրճատվեն, ավանդատուները հավատացած կլինեն, որ նոր համակարգն ավելի ուժեղ է:
«Բանկերի խոշորացումից հետո մեծ բանկերը պետք է ավելի ճկուն լինեն. որպես կանոն, փոքր և միջին բանկերն ավելի ճկուն են լինում, մեծերը դանդաղ են առաջ շարժվում: Միջազգային փորձը ցույց է տալիս, որ միջին և խոշոր բանկերը դրական են անդրադառնում տնտեսության վրա»,-հայտնեց Չիլինգարյանը:
Ինչ վերաբերում է վատ կողմերին, մասնավորապես, համակարգում մոնոպոլիաների առաջացմանը, Չիլինգարյանը նկատեց, որ նոր Բազելի ներդրումը կնպաստի առողջ մրցակցությանը և ճիշտ կառավարմանը:
Նկատնեք, որ բանկերի միաձուլման գործընթացում, որպես կանոն, միաձուլման գնում են փոքր կապիտալով բանկերը: Ըստ 2014թ. երրորդ եռամսյակի բանկային ցուցանիշների՝ 21 առևտրային բանկերի ընդհանուր կապիտալի նկարագիրը հետևյալն է. «Ինեկոբանկ»՝ 25 մլրդ դրամ, «Բիբլոս բանկ»՝ 8.5 մլրդ դրամ, «Առէկսիմբանկ»՝ 20 մլրդ դրամ, «Անելիք բանկ»՝ 13.5 մլրդ դրամ, «Ամերիաբանկ»՝ 41 մլրդ դրամ, «Ակբա-կրեդիտ ագրիկոլ բանկ»՝ 53.5 մլրդ դրամ, «Արցախբանկ»՝ 12.7 մլրդ դրամ, «ՎՏԲ-Հայաստան»՝ 45.6 մլրդ դրամ, «Զարգացման հայկական բանկ»՝ 9.6 մլրդ դրամ, «Յունիբանկ»՝ 22 մլրդ դրամ, «Պրոմեթեյ բանկ»՝ 22 մլրդ դրամ, «Հայբիզնեսբանկ»՝ 28 մլրդ դրամ, «Մելլաթ բանկ»՝ 11 մլրդ դրամ, «Կոնվերս բանկ»՝ 22 մլրդ դրամ, «Էյչ-Էս-Բի-Սի բանկ»` 47 մլրդ դրամ, «Հայէկոնոմբանկ»` 11 մլրդ դրամ, «ԲՏԱ բանկ»` 5.6 մլրդ դրամ, «Արդշինինվեստբանկ»` 47 մլրդ դրամ, «Արարատ բանկ»` 22 մլրդ դրամ, «Պրոկրեդիտ բանկ»` 9 մլրդ դրամ: Բանկերի ընդհանուր կապիտալացումը կազմում է մոտ 500 մլրդ դրամ: Պարտավորությունները և կապիտալը ընդհանուր առմամբ կազմում են մոտ 3 տրիլիոն դրամ:
Ըստ այս ցանկի՝ համեմատաբար փոքր կապիտալ ունեն «ԲՏԱ բանկը», «Բիբլոս բանկը», «Պրոկրեդիտ բանկը», «Զարգացման հայկական բանկը» և այլն:
