Ներիշխանական պատերազմը, որ վերջին երկու շաբաթներին ծավալվում էր ՀՀԿ-ի և ԲՀԿ-ի, կամ Սերժ Սարգսյանի և Գագիկ Ծառուկյանի միջև, մեծ հաշվով, իհարկե, որևէ կապ չունի այն խնդիրների հետ, որոնք ներկայումս կանգնած են Հայաստանի առջև թե՛ որպես պետություն, թե՛ որպես հասարակություն: Եվ կապ չի ունենա այնքան ժամանակ, քանի դեռ նրանցից որևէ մեկը մյուսին հստակ չի ներկայացրել դիտողություններ և հարցադրումներ, որոնք կապ ունեն պետության և հասարակության խնդիրների հետ:
Ներիշխանական կամ ներհամակարգային այդ վիճաբանություններն ու «բամփոցներն»ընդամենը տեղի են ունենում փոխադարձ մեղադրանքներով, թե ով է ումից վատ, ով է ումից ավելի «դոդ», ինչը նշանակում է, որ կողմերն ընդամենը հաշիվներ են մաքրում, ոչ թե պայքար ծավալում պետության զարգացման հեռանկարների շուրջ: Հետևաբար, այն ամենը, ինչ կատարվում է ներհամակարգային թևերի միջև, ընդամենը պայքար է իշխանության համար, իշխելու իրավունքի համար, որը նրանք վիճարկում են միմյանց միջև: Ասել, որ այս շաբաթվա սրընթաց իրադարձություններից և ԲՀԿ֊ի ոչնչացումից հետո հասարակության կյանքում ոչինչ չի փոխվի, իհարկե կլինի սխալ: Ինչ-որ բաներ անպայման կփոխվեն, քանի որ առաջիկայում ԲՀԿ առաջնորդը, որոշ պատգամավորներ երբեմն ստիպված են լինելու թեկուզ իմիտացիոն քայլեր և ժեստեր անել հասարակության ուղղությամբ, սակայն այդ փոփոխությունները կլինեն ընդամենը կոսմետիկ բնույթի և չեն ստանա համակարգային ընթացք:
Մինչդեռ Հայաստանի հրամայականը համակարգային փոփոխությունն է: ՀՀԿ-ն ու ԲՀԿ-ն միմյանց միջև էժանագին «ռազբորկաներով» ընդամենը վկայեցին, որ ունակ չեն իրականացնել այդպիսի փոփոխություն: Նրանց մոտ ստացվում է ընդամենը խիստ գողական մակարդակի վիճաբանություն, ինչին էլ ականատես է լինում հասարակությունը: Դրան հետևելը ինչ-որ ժամանակահատված հաճելի և հետաքրքիր ժամանց էր, հետո արդեն սկսեց է ձանձրացնել, իսկ ինչ-որ պահից էլ այն դարձավ պարզապես տհաճ: Հիմա մենք կարծես թե մոտեցել ենք տհաճ ժամանակահատվածի վերջին, երբ զգում ենք, որ համակարգը՝ իր ՀՀԿ և ԲՀԿ թևերով կարծես սկսում են զզվանք առաջացնել, իսկ դա նշանակում է, որ այդ տհաճ ու զգացողությունն առաջիկայում հասարակությանը կարող է հանել նրանց բոլոր դեմ դեմ:
Այնպես որ, երևի թե հասարակությունն էլ ներկայումս մի քիչ ձևեր պետք է թափի` ցույց տալով, որ ՀՀԿ-ԲՀԿ թամաշան միշտ էլ հետաքրքիր է: Մենք գիտենք, որ այս ամենը պետության հետ կապ չունի, որ սա ընդամենը «ռազբորկա» է իշխանության համար, բայց մեզ սա էլ հետաքրքիր է, այնպես որ շարունակեք, պարոնայք, առավել ևս, որ դուք ավելի հանրօգուտ գործով զբաղված չեք և զբաղվողն էլ չեք:
