Հայաստանյան բանկերի մեծ մասը սկսել է հանել դոլարի առքուվաճառքի հետ կապված գումարային սահմանափակումները: Դեռ տարեվերջին՝ դրամի կտրուկ արժեզրկման օրերին, բանկերից դոլար գնելը գրեթե անհնար էր կամ հնարավոր էր առավելագույնը 100-200 դոլարի փոխանակում անձնագրի պարտադիր առկայության դեպքում:
Մի քանի օր անց դոլար վաճառելու հարցում ևս սահմանափակումներ եղան, այս անգամ՝ պայմանավորված դրամի դեֆիցիտով: Տարբեր բանկերի սահմանափակումները տարբեր էին, առավելագույն գումարը, որ հնարավոր է վերածել դրամի կամ հակառակը, չէր գերազանցում 2000 դոլարի սահմանը:
«Առաջին լրատվական»-ի փոքրիկ հարցախույզի ընթացքում պարզ դարձավ, որ միայն «Ակբա կրեդիտ ագրիկոլ բանկում» կա տարադրամի փոխանակման խնդիր: Չնայած բանկը գումարային սահմանափակում չունի, սակայն սպասարկում է միայն իր մշտական հաճախորդներին:
Հարցվող մնացած բանկերը՝ «Անելիք բանկը», «ՎՏԲ-Հայաստանը», «Ամերիա բանկը», «Հայբիզնեսբանկը», «Էյչ-էս-բի-սի բանկը» սահմանափակումներ չունեն, սպասարկում են և՛ նոր, և՛ հին հաճախորդներին: Միայն թե բոլոր բանկերի դեպքում 500 դոլարի սահմաններում գումար փոխանակելու դեպքում անհրաժեշտ է անձնագիր:
Բանկերից մեկի աշխատակցուհին «Առաջին լրատվական»-ի հետ զրույցում տեղեկացրեց, որ փետրվարի սկզբից իրենց բանկում ամբողջ ծավալով փոխանակումներ իրականացվում են, սակայն եթե նորից դոլարն արժևորվի, չի բացառվում, որ արհեստական սահմանափակումներ լինեն՝ դոլարի վաճառքի հետ կապված:
Վերջինս նշեց, որ չնայած իրենց բանկն ուժեղ կապիտալիզացիա ունի, այնուամենայնիվ, քանի դեռ, արտաքին մի շարք գործոններից կախված, ֆինանսական շուկան շարունակում է բացասական ազդակներ ստանալ, իրենք որդեգրել են զգուշավորության քաղաքականություն և ընտրել են կարճաժամկետ պլանավորման ռազմավարությունը:
Ինչ վերաբերում է փոխանակման ծավալային տարբերությանը, մեր զրուցակիցը նշեց, որ դեկտեմբերին իրենց բանկից 82 տոկոս դոլար են գնել, հունվարին գրել են նույնչափ դրամ, իսկ փետրվարի առաջին շաբաթվա վիճակագրությունը դեռևս ամփոփված չէ:
Բանկերի տեղեկատուներից հայտնեցին, որ տարադրամի փոխանակման կետերում հերթեր չկան, իսկ եթե անհրաժեշտ է արագ սպասարկում, անհրաժեշտ է անձնագրի և այլ տվյալներ ուղարկել էլեկտրոնային տարբերակով և փոխանակման գումարը նախօրոք պատվիրել:
ԿԲ-ից բանկերի վերահսկողությունը, ըստ մեր զրուցակցի, մի փոքր թուլացել է, սակայն աուդիտը նախկինի պես ընթանում է խստացված ռեժիմով: