Սերժ Սարգսյանն արձագանքել է Լևոն Տեր-Պետրոսյանի նամակին, որով ՀԱԿ առաջնորդը նրանից դեմ առ դեմ հանդիպում էր ակնկալել՝ հայտնելով նման պատրաստակամություն Ցեղասպանության 100-րդ տարելիցի շուրջ քննարկումների և նոր փաստաթղթի ընդունման համար:
Սերժ Սարգսյանը Տեր-Պետրոսյանին նախ հիշեցրել է Ցեղասպանության 100-րդ տարելիցի առիթվ ընդունված համահայկական հռչակագրին նրա տված գնահատականները, որոնք, մեղմ ասած, այնքան էլ դրական չէին: Սարգսյանը բնականաբար մերժել է այդ գնահատականները՝ ասելով, որ դրանք անհիմն են: Այս ամենով հանդերձ, Տեր-Պետրոսյանի նամակն արդեն ըստ էության կորցնում է իմաստը՝ երկրորդ նամակը, սակայն Սերժ Սարգսյանը հայտարարել է, որ, այնուամենայնիվ, 100-րդ տարելիցի շրջանակում շատ անելիքներ կան, և եթե Տեր-Պետրոսյանն ուզում է, ապա ինքը պատրաստ է այդ անելիքները քննարկել անգամ դեմ առ դեմ: Այս կապակցությամբ Սարգսյանը Տեր-Պետրոսյանին հորդորում է տեղեկացնել իրեն, եթե դեռ պահպանում է դեմ առ դեմ հանդիպելու մտադրությունը:
Փաստորեն, Սերժ Սարգսյանը նախ բովանդակային իմաստով մերժում է Տեր-Պետրոսյանին՝ սրանով իսկ ցույց տալով, որ հանդիպումն ունի լրիվ այլ առաքելություն՝ առնվազն իր համար, այսինքն՝ մեծ հաշվով Տեր-Պետրոսյանի հրապարակած բովանդակությունն իր համար կարևոր կամ հետաքրքրական չէ: Սակայն, այնուամենայնիվ, նա չի մերժում հանդիպման առաջարկը, բայց բովանդակային մերժմամբ ընդունելով այն՝ ըստ էության, հանդիպումը դուրս է դնում պաշտոնապես հռչակված հարթությունից և կարծես թե ցանկանում ընդգծել, որ իրականում այդ բովանդակությունը Տեր-Պետրոսյանի համար պարզապես հանդիպելու առիթ է եղել:
Այսպիսով, Սերժ Սարգսյանն իր պատասխան նամակով Տեր-Պետրոսյանին ըստ էության ստիպում է կրկնել առաջարկը՝ դրանով իսկ հաստատելով, որ կարևորը հանդիպումն է, իսկ բովանդակային առաջարկն ընդամենը առիթ է: Այլ կերպ ասած՝ Սերժ Սարգսյանը փորձում է ավելի տեսանելի ցույց տալ, որ Տեր-Պետրոսյանն էլ Ծառուկյանի նման կապիտուլյացիայի է գալիս, ոչ թե Ցեղասպանության հետ կապված հարցեր քննարկելու: Ու հենց այս նպատակը ցույց տալու կամ առնվազն իրավիճակն այս նպատակին բերելու համար Սերժ Սարգսյանն ընդունում է գաղափարը, սակայն առաջարկը հետ է ուղարկում՝ ըստ էության հորդորելով կրկնել, իհարկե՝ մտածելուց հետո: Ներկայիս վիճակում Սերժ Սարգսյանն, իհարկե, իրեն կարող է թույլ տալ նման արձագանքի հնարավորություն, քանի որ և́ ինքն է ներկայումս ավելի ուժեղ քաղաքական դիրքերում Ծառուկյանի նահանջից հետո, և́ Տեր-Պետրոսյանն է հայտնվել մի վիճակում, երբ ոչինչ չի կարող թելադրել, և ըստ էության՝ ինքը պետք է սպասի Սերժ Սարգսյանից որևէ առաջարկի:
Տեր-Պետրոսյանն, ըստ էության, ինքն էլ համակերպվել է այս իրավիճակին, ինչի մասին վկայում էր նրա վերջին նամակը «Մեծարգո Սերժ Սարգսյանին», սակայն ՀԱԿ նախագահն այս ամենն ուզում էր անել իր համար, այսպես ասած, արժանապատիվ ձևով, իսկ Սերժ Սարգսյանը, ինչպես երևում է, համաձայն չէ: