Չփլախյանները դիմել են Վարչական դատարան՝ բողոքարկելով Դատական ակտերի հարկադիր կատարողների որոշման դեմ, համաձայն որի՝ ընտանիքին օրերս պետք է վտարեին իրենց տնից: Հայցը վարույթ է ընդունվել, ինչը նշանակում է, որ մինչև դատաքննության ավարտը ընտանիքը դեռ կշարունակի ապրել իր տանը: Այդ տունը, սակայն, ըստ փաստաթղթերի, այլևս չի պատկանում Չփլախյաններին:
Դեռևս 2011 թ. նրանք այն «վաճառել են» կառավարության արդեն նախկին աշխատակից Նունե Պլուզյանի մորաքրոջ տղային: Չփլախյանները, սակայն, պնդում են, որ առուվաճառքի գործարքը շինծու է, որ իրականում տեղի է ունեցել հանցագործություն, որի արդյունքում իրենք զրկվել են սեփական տնից:
«Մենք մեր տունը չենք վաճառել, հակառակ դեպքում 4 տարի առաջ իբր վաճառած տնից մեզ վաղուց դուրս հանած կլինեին: Ես տոկոսով փող էի վերցրել Նունե Պլուզյանից, որի դիմաց պիտի տունս գրավ դնեի, բայց Նունեն ինձ ստիպեց, որ շինծու գործարք կնքեմ, տունը իբր վաճառեմ իրեն, և ձևակերպեց մորաքրոջ տղայի անունով»,- «Առաջին լրատվական»-ին պատմեց Սիրանուշ Չփլախյանը:
Սիրանուշի խոսքով՝ ամիսներ շարունակ տոկոս փակելուց հետո Նունե Պլուզյանի մորաքրոջ տղան անսպասելիորեն դիմել է դատարան՝ իրեն «պատկանող» տնից Չփլախյաններին վտարելու պահանջով:
«Այդ մարդը նույնիսկ մեր տան տեղը չգիտի, նա երբեք չի եկել մեր տուն, մի՞թե հնարավոր է տուն առնել՝ առանց այն տեսնելու»,- հռետորական հարց է տալիս Սիրանուշը:
Նա բազմաթիվ անգամներ դիմել էր ՀՀ վարչապետին՝ բողոքելով կառավարության աշխատակից Նունե Պլուզյանի դեմ: Այս տարվա հունվարից Նունե Պլուզյանն այլևս կառավարությունում չի աշխատում, թեև նա շարունակում է պնդել, որ որևէ կապ չունի Չփլախյանների տան գործարքի հետ: Այնուամենայնիվ, նույնիսկ կառավարությունում նրան չեն հավատացել և հեռացրել են աշխատանքից՝ «հաստիքը կրճատելու» պատրվակով:
Ներկայումս Սիրանուշ Չփլախյանի քույրը՝ Օֆելյա Չփլախյանը, դիմել է Էրեբունի և Նուբարաշեն վարչական շրջանների ընդհանուր իրավասության դատարան՝ պահանջելով չեղյալ համարել տան առուվաճառքի պայմանագիրը:
Դատական նիստը նշանակված է փետրվարի 27-ին՝ ժամը 13:00-ին:
Հ.Գ.- Չփլախյանները նաև դիմել էին ՀՀ ոստիկանություն՝ հայտնելով տեղի ունեցած հանցագործության մասին: Հարուցվել էր քրեական գործ, որը, սակայն, կարճվել է: «Նունեն ամեն տեղ իր ծանոթներով կարողանում է այնպես անել, որ որոշումներն իր օգտին կայացվեն»,- վստահեցնում է Սիրանուշ Չփլախյանը: Հարուցված քրեական գործի նյութերը մեր ձեռքի տակ են: Առաջիկայում մենք կանդրադառնանք դրանց:
