Կառավարությունը երեկ վերջապես հավանություն տվեց Որոտանի ՀԷԿ-երի համալիրը ամերիկյան «Կոնտուր գլոբալ հիդրոկասկադ» ընկերությանը վաճառքի պայմանագրի լրամշակված տարբերակին: Հիշեցնենք, որ 2014թ. հունվարի 29-ին «Կոնտուր Գլոբալ» ընկերությունը ՀՀ կառավարության հետ ստորագրեց Որոտանի «Սպանդարյան», «Շամբ» և «Տաթև» ՀԷԿ-երը ձեռք բերելու պայմանագիրը: Վաճառքի գինը կազմում էր 180 միլիոն դոլար, ամերիկյան ընկերությունը 6 տարիների ընթացքում ևս 70 մլն դոլարի ներդրում պետք է կատարեր:
Պայմանագիրը կնքվել էր նախկին վարչապետ Տիգրան Սարգսյանի օրոք, ով հիմա ԱՄՆ-ում Հայաստանի դեսպանն է: Իսկ վաճառքի պայմանագրում նաև նշված էր, թե այն պետք է ստորագրվի 75 օրվա ընթացքում, այսինքն` 2014թ. ապրիլի կեսերին: Մինչ այդ, սակայն, Տ. Սարգսյանը հրաժարական տվեց, և վարչապետ նշանակվեց Հովիկ Աբրահամյանը: Վերջինս եկավ ու անմիջապես կասեցրեց այդ գործարքը՝ փակման ակտը չէր ստորագրվում: Այդպիսով ամերիկյան ընկերությունը դեռ չէր հանդիսանում Որոտանի ՀԷԿ-երի սեփականատերը: Պաշտոնապես հայտարարվեց, թե որոշ տեխնիկական հարցեր կան, որոնք հստակեցնելու պատճառով գործարքն ավարտին կհասցնեն: Իսկ թե ինչ տեխնիկական հարցեր էին, իշխանություններն այդպես էլ չբացահայտեցին:
Որոտանի ՀԷԿ-երի վաճառքի գործընթացներն ընթանում էին մի ժամանակ, երբ զուգահեռ ընթանում էր Հայաստանի՝ Եվրասիական տնտեսական միությանն անդամագրվելու գործընթացը: Այդ ժամանակ անգամ կարծիքներ էին շրջանառվում, թե Ռուսաստանը թույլ չի տալիս, որ Հայաստանի այդ եզակի էներգետիկ օբյեկտը վաճառվի ամերիկյան ինչ-որ մի ընկերության: Չէ՞ որ մեր երկրի էներգետիկ համակարգի մոտ 80 տոկոսը գտնվում է Ռուսաստանի ազդեցության ներքո: Մյուս կողմից էլ` Որոտանի ՀԷԿ-երը ամերիկյան ընկերությանը վաճառելը համարվեց ՀՀ էներգետիկ համակարգի դիվերսիֆիկացմանն ուղղված քայլ:
Իսկ այս մեկ տարվա ընթացքում հայտնի չէ, թե ինչ փոփոխություններ են կատարվել ամբողջությամբ պետական սեփականություն համարվող Որոտանի ՀԷԿ-երի վաճառքի պայմանագրում, ինչ լրամշակում են կատարել կամ ինչ պայման են փոխել: Որոշ տեղեկությունների համաձայն` անցած տարի կառավարության փոփոխությունից հետո կառավարության աշխատակազմի ղեկավար-նախարար Դավիթ Հարությունյանը ուսումնասիրել է պայմանագիրը և Հայաստանի օրենսդրության հետ որոշակի հակասություն է գտել: Դեռ այն ժամանակ բարձրաձայնվեց, որ ՀԷԿ-երի հետ ջրամբարներն ու դամբաները վաճառելը հակասում է մեր օրենսդրությանը, և նոր կառավարությունը փորձել է այդպիսով հետաձգել կամ կասեցնել այդ գործարքը, ինչը և արվեց:
Այդպիսով, ասում են, կառավարությունը ցանկացել է կասկադը ընդհանրապես զերծ պահել ամերիկյան ընկերությանը հանձնելուց՝ պատճառ բերելով, թե օրենսդրական խնդիրներ կան: Ասում են նաև, որ ամերիկյան կողմն էլ կոպիտ հակադարձել է, թե Ռուսաստանին հանձնած էներգետիկ օբյեկտների գործարքներն ամբողջությա՞մբ են համապատասխանել ՀՀ օրենսդրությանը: Մի խոսքով, ամերիկյան կողմը կառավարությանը հասկացրել է, որ պետք չէ այդքան ընդդիմանալ, և միգուցե ավելի ճիշտ կլինի վեր հանել ՌԴ-ին հանձնած էներգետիկ օբյեկտների գործարքների անհամապատասխանությունը ՀՀ օրենսդրությանը: Ընդ որում` կարծիք կա, որ անցած աշնանը նաև հենց այս քայլի համար Հ. Աբրահամյանին ԱՄՆ-ում պատշաճ ընդունելության չարժանացրեցին: Եվ հիմա նա թեև ուշացած, բայց փորձում է սրբագրել իր քայլերն ու արժանանալ ԱՄՆ-ի բարեհաճությանը:
Ասում են` հիմա գործարքի նախկին անունը փոխել են, և կարծես թե ՀԷԿ-երը ամերիկյան այդ ընկերությանն են հանձնվում 100 տարով հավատարմագրային կառավարման պայմանով: Իսկ թե ուրիշ ինչ պայմաններ կան կամ ինչ պայմաններ են փոխվել, հայտնի չէ: Նախկին պայմանագրի պայմանների մասին ամենալավը տեղեկացված էր էներգետիկայի նախկին նախարար Արմեն Մովսիսյանը: Հիմա հավանաբար մանրամասն տեղեկացված կլինի Երվանդ Զախարյանը: