ԲՀԿ-ն դադարել է գոյություն ունենալուց. այդ կուսակցության խորհրդարանական խմբակցության 36 անդամներից որևէ մեկը չի գնում խորհրդարան: Իսկ նրանք, ում հնարավոր է ինչ-որ կերպ տեսնել, կտրուկ հայտարարում են, որ իրենք ոչինչ չգիտեն և դժվար թե առաջիկայում որևէ բան իմանան: ԲՀԿ-ականները խոստովանում են, որ իրենք չգիտեն, թե առաջիկայում ինչ քաղաքական կուրս է ունենալու կուսակցությունը, իրենք շարունակո՞ւմ են պահանջել արտահերթ ընտրություներ, թե՞ այլևս դադարել են նման պահանջ ներկայացնելուց, իրենք շարունակո՞ւմ են համագործակցել ՀԱԿ-ի և «Ժառանգության» հետ, թե՞ այդ համագործակցությունը դադարել է, իրենք ընդդիմությո՞ւն են, հետ են վերադարձել այլընտրանք լինելո՞ւն, թե՞ ընդհանրապես դառնում են իշխանության կցորդ: Նրանք անգամ չգիտեն՝ Գագիկ Ծառուկյանը մնո՞ւմ է կուսակցության նախագահ, թե՞ ոչ:
ԲՀԿ-ականներին նման անորոշության է մատնում հենց վերջին հանգամանքը. իրենք կորցրել են կապը կուսակցության նախագահի հետ՝ ուղիղ կամ միջնորդավորված:
Ծառուկյանը իրականում դադարել է ԲՀԿ-ականների համար հեղինակություն լինելուց, չնայած նրանց մի մասը պնդում է, որ երկու օր առաջ տեղի ունեցած հանդիպման ժամանակ իրենք խնդրել են, որպեսզի Ծառուկյանը շարունակի մնալ կուսակցության նախագահ: Երբ Ծառուկյանը հայտարարել է, որ ինքը մտադիր է լքել կուսակցությունը և քաղաքականությունը, ԲՀԿ-ականները սկսել են խնդրել, որ նա այդպիսի բան չանի: Ծառուկյանը խոստացել է հաշվի առնել կուսակիցների խնդրանքը, սակայն ԲՀԿ-ականներն ասում են, թե իրենք էլ են հասկանում, որ Ծառուկյանի մնալ-չմնալը ո́չ իրենց ցանկությունից է կախված, ո́չ Ծառուկյանի որոշումից:
ԲՀԿ-ից հեռանալ ցանկացողների թիվը չափազանց մեծացել է: ԲՀԿ-ից ցանկանում են հեռանալ ոչ միայն գործարար ՀՀԿ-ականները, այլ նաև քաղաքական թևի ներկայացուցիչները: Ըստ ԲՀԿ-ականների՝ կուսակցությունից դուրս գալու իր ցանկության մասին է հայտարարել նախկին արտգործնախարար Վարդան Օսկանյանը, որը հայտարարել է, որ նման պայմաններում կուսակցությունում իր մնալն այլևս նպատակահարմար չէ: Սակայն այն ԲՀԿ-ականները, ովքեր դեռ որոշում չեն կայացրել իրենք հետագա քաղաքական ճակատագրի վերաբերյալ, համոզել են, որ նա առժամանակ կասեցնի իր որոշման իրականացումը, մինչև ինչ-որ հստակեցումներ տեղի կունենան:
ԲՀԿ-ի չգոյության մեկ այլ՝ ավելի ակնառու օրինակ է «Շրջանառության հարկի մասին» ՀՀ օրենքի շուրջ տեղի ունեցած իրադարձությունները: Տնտեսական հարցերի հանձնաժողովի ԲՀԿ-ական փոխնախագահ Միքայել Մելքումյանը այդ օրենքում փոփոխություններ կատարելու օրենսդրական նախաձեռնություն էր ներկայացրել: Փետրվարի 18-ին նշանակված էր հանձնաժողովի նիստը, որի օրակարգում ընդգրկված էր Մելքումյանի ներկայացրած փոփոխության նախագիծը, իսկ Միքայել Մելքումյանն այդ քննարկման ժամանակ պետք է հանդես գար որպես հիմնական զեկուցող:
Այդ նիստը այդպես էլ չկայացավ, դրա փոխարեն փետրվարի 20-ին նշանակվել է տնտեսական հարցերի հանձնաժողովի նոր նիստ, որի օրակարգումը Միքայել Մելքումյանի հեղինակած փոփոխությունը չկա: Սրա պատճառը կարող է լինել ոչ միայն այն, որ Միքայել Մելքումյանը արդեն երեք օր է՝ չի գնում խորհրդարան աշխատանքի, այլ գուցե նա չգիտի, թե ընդհանրապես ԲՀԿ-ն պե՞տք է նման փոփոխություն ներկայացնի, արդյոք փոքր և միջին բիզնեսի շահերի պաշտպանությունը մտնո՞ւմ է ԲՀԿ ընթացիկ օրակարգում, թե՞ այլևս դադարել է այդպիսին լինելուց:
Երկուշաբթի օրը սկսվելու է ԱԺ հերթական նստաշրջանը: Մինչև նախորդ շաբաթվա ՀՀԿ քաղխորհրդի նիստը ԲՀԿ-ականները մտադիր էին որոշում կայացնել և բոյկոտել այն՝ պահանջելով, որ իրենք կվերադառնան ԱԺ դահլիճ միայն այն դեպքում, եթե իշխանությունները հստակ երաշխիքներ տան, որ կբացահայտեն ակտիվիստ Արտակ Խաչատրյանի դեմ հարձակում իրականացրածների ինքնությունը: Հիմա Արտակ Խաչատրյանի ծեծը մղվել է հետին պլան, բայց ԲՀԿ-ականները հիմա էլ կարող են ինքնաբերաբար բոյկոտել ԱԺ նիստը, առանց ընդհանուր որոշման՝ ամեն մեկը սեփական նկատառումներից ելնելով: