Արմավիրի մարզի ընդհանուր իրավասության դատարանում Վահե Խալաթյանի նախագահությամբ ավարտվել է Լուսիկ Փիրլազադյանի գործի դատական քննությունը:
51-ամյա Լուսիկը արգելանքի տակ է վերցվել 2014 թվականի հոկտեմբերի 21-ին:
Ըստ դատական ակտի՝ Լուսիկն ամուսնացած չէր, նա իր եղբոր՝ Արթուրի, ու մոր՝ Կրուպսկայայի հետ էր ապրում: Վերջինս տառապել է ծերունական սկլերոզով, հաճախ տնից դուրս է եկել ու մոլորվել, չի կարողացել տուն վերադառնալ:
Լուսիկն ու եղբայրը մորը տարբեր վայրերից գտել ու տուն են տարել:
Բայց նրանք այդ բանն արել են տհաճությամբ, տանը հաճախ վիճել են մոր հետ, ծեծել են հիվանդ մորը: Իրենք էլ սակավամտություն են ունեցել…
Ըստ դատական ակտի՝ հերթական անգամ նրանց տանը վեճ է առաջացել 2014 թվականի հոկտեմբերի 18-ին:
Այդ օրը մինչև ժամը 22-ը Լուսիկի եղբայրը տանը չի եղել:
Ժամը 19-ի սահմաններում Կրուպսկայան դուրս է եկել տանից, իսկ Լուսիկը նրան հետո գտել ու տուն է տարել:
Նա վիճել է մոր հետ, փայտով, ձեռքերով ու ոտքով հարվածներ է հասցրել մորը:
Ժամը 22-ի սահմաններում տուն է եկել Լուսիկի եղբայրը, նստել է հաց ուտելու: Նա մի քանի անգամ մորն առաջարկել է իր հետ հաց ուտել, բայց մայրը հրաժարվել է: Որդին վրդովվել է: Նորից վեճ է առաջացել:
Քույր ու եղբայր ծեծել են իրենց մորը, այնպես են ծեծել, որ մայրը փախել է տնից: Լուսիկը գնացել է մոր հետևից, համոզել ու տուն է տարել: Բայց մորը նորից ծեծել են, ինչի պատճառով ծեր կինը տնից դուրս է եկել, գիշերել է բակում:
Նրա զավակները իրենց անկողիններ են մտել ու քնել:
Առավոտյան շուտ որդին արթնացել է, դուրս է եկել բակ ու տեսել է մորը՝ գրեթե անգիտակից վիճակում: Նա կանչել է քրոջը, միասին մորը տուն են տարել, բայց Կրուպսկայան, գիտակցության չգալով, մահացել է: Մինչև մահանալը նա կցկտուր խոսքեր է ասել, թե ուզում է գնալ-հասնել հանգուցյալ ամուսնուն:
Ժամը 8-ի սահմաններում Փիրլազադյանները հարևանին տեղեկացրել են, թե իրենց մայրը վատացել է:
Հարևանը գյուղի բժշկի հետ գնացել է նրանց տուն, տեսել է, որ տարեց կինը մահացած է:
Շտապօգնություն են կանչել, որի աշխատողները, մահացած կնոջ մարմնին վնասվածքներ տեսնելով, ահազանգել են ոստիկանություն:
Դատահոգեբուժական փորձաքննությամբ Արթուր Փիրլազադյանը ճանաչվել է անմեղսունակ, նրան տեղափոխել են հոգեբուժական հիվանդանոց:
Լուսիկ Փիրլազադյանը ճանաչվել է սահմանափակ մեղսունակ: Նրան մեղադրանք է առաջադրվել դիտավորությամբ տուժողի՝ իր մոր առողջությանը ծանր վնաս հասցնելու համար, ինչի հետևանքով տուժողը մահացել է՝ ՀՀ քրեական օրենսգրքի 112 հոդվածի 2-րդ մասի 14-րդ կետով:
Նախաքննության ժամանակ Լուսիկն իրեն լիովին մեղավոր է ճանաչել:
Դատարանում նա ասել է, թե վերջին ժամանակներս մայրը «խելքը լրիվ թռցրել էր, իր կամքից անկախ՝ դուրս էր գնում»: Լուսիկի կարծիքով՝ մայրն իրեն ու եղբորը չի սիրել, «ամեն փուչ բանից» իրենց տանը վեճ է եղել: Մայրը փախել է տանից: Ինքն ու եղբայրը չեն ցանկացել սպանել մորը, բայց այդպես ստացվել է: Մայրն էլ իրենց է խփել:
Դեպքի օրը մորը հիմնականում Արթուրն է ծեծել: Ինքն այդ օրը չի խփել, «բացառված է», երևի մայրն աստիճաններից է գլորվել:
Այս գործով տուժած կնոջ իրավահաջորդը՝ նրա եղբոր կինը, գործի դատաքննության ընթացքում՝ 2015 թվականի հունվարի 16-ին, նույնպես մահացել է… Նա հասցրել է ցուցմունք տալ, ասել է, որ տուժողի տուն շատ քիչ մարդիկ են ելքումուտք ունեցել՝ նրանց տան ծանր իրադրության հետ կապված:
Որպես տուժողի իրավահաջորդ է ներգրավվել Լուսիկի քույրը՝ սպանված Կրուպսկայայի դուստրը, ով ասել է, թե ցանկանում է, որ քույրը՝ Լուսիկը, ամենախիստ պատիժը կրի արարքի համար: Լուսիկը, ըստ քրոջ, «չարիք է, եթե ազատության մեջ մնա՝ վնաս կտա», ինքը վախենում է նրանից: Եղբայրը հիվանդ է եղել՝ ի տարբերություն Լուսիկի: Ինքը մորն առաջարկել է իր տուն գնալ, բայց մայրը չի գնացել…
Դատարանը Լուսիկ Փիրլազադյանին մեղավոր է ճանաչել մեղսագրված արարքի համար ու դատապարտել է 7 տարի ազատազրկման:
