Գեղարքունիքի մարզի Սոթք եւ Կոտայքի մարզի Մեղրաձորի հանքավայրերի շահագործման վերաբերյալ ՀՀ Վերահսկիչ պալատը բազմաթիվ խախտումներ են արձանագրել, որոնք ուղարկել են ՀՀ կառավարություն: Նկատենք, որ 2007թ. հանքարդյունահանման նպատակով ընդերքի օգտագործման լիցենզիային պայմանագիր է կնքվել «Արարատ» ոսկու արդյունահանման ձեռնարկություն ՍՊԸ-ի եւ Բնապահպանության նախարարի միջեւ, համաձայն որի՝ վերոնշյալ ՍՊԸ-ի անուղղակի սեփականատեր է դառնում «Գեոպրոմայնինգ լիմիթեդ» ընկերությունը, որն էլ Սոթքում օրինական հանքահանում իրականացնելու համար պետք է որոշակի կետեր իրականացնի: Մասնավորապես` ձեռնարկության նախկին ղեկավարությունից ժառանգած մի շարք թերությունների շտկելու եւ վերամշակման տեխնոլոգիաների կատարելագործման համար լիցենզառուն պետք է նոր ներդրումային նախագիծ մշակեր, ինչպես նաեւ պետք է վերագնահատեր եւ կառավարության հաստատմանը ներկայացներ ամբողջ հանքավայրի պաշարները: «Գեոպրոմայնինգ լիմիթեդը» նաեւ պարտավորվել է Սոթքի հանքավայրից տարեկան նվազագույնը արտահանել 600 հազար տոննա հանքաքար: Այս բոլոր պայմաններից եւ ոչ մեկը լիցենզիա ստացած ընկերությունը չի իրականացրել, սակայն ոսկու հանքի շահագործվել է: Տարեկան նվազագույնը 600 հազար տոննայի փոխարեն 2007թ. արդյունահանվել է 16655տ., 2008-ին` 29236տ., 2009-ին` 320554տ: Ավելին, ընկերությունը հանքավայրի շահագործման համար պետք է պետբյուջե վճարեր Սոթքի հանքավայրի համար` 3մլն 830 հազ. դրամ, Մեղրաձորի համար` 2մլն 210 հազ. դրամ, որն առ այսօր չի վճարվել: Նշենք, որ էներգետիկայի եւ բնական պաշարների նախարարությունը կարող էր կանխել այս անօրինական գործողությունները` գրավոր նախազգուշացմամբ սահմանելով առավելագույնը 90 օրյա ժամկետ: Սակայն բացի նրանից, որ այդ նախազգուշացումը չի եղել, ավելին` ընկերությանը Սոթքի եւ Մեղրաձորի հանքերը օգտագործման համար տրվել են մինչեւ 2012թ.: Վերահսկիչ պալատի ստուգումներով պարզվել են, որ «Գեոպրոմայնինգ լիմիթեդի» 100 տոկոս բաժնեմասը գրավադրված է «VTB kapital PAC» բանկում ի շահ «Կարլո բիբի» ընկերության 250 մլն դոլարի վարկի դիմաց, որից որպես ներդրում հայաստանյան «Գեոպրոմայնինգ գոլդ» ՍՊԸ-ին որեւէ միջոցներ չեն հատկացվել: Ավելին, Սոթքում ոսկու արդյունահանմամբ զբաղվող ընկերությունը աշխատել է խոշոր վնասներով այն դեպքում, երբ միջազգային շուկայում ոսկու գները աճել են: 2007թ. ընկերության վնասը կազմել է 15 մլդ 654 մլն դրամ, իսկ աղքատացման ցուցանիշը ծրագրով սահմանված 15 տոկոսի փոխարեն 36 տոկոս է եղել, որն անթույլատրելի է: Պարզվում է 2004-2008թ.թ. ընթացքում Սոթքի ռւ Մեղրաձորի ոսկու հանքավայրերը շահագործվել եւ հանքարդյունահանում էլ իրականացվել է ապօրինի, քանի որ ուժի մեջ մտած լիցենզա չի եղել: