Վրացական Apsny.ge կայքի փոխանցմամբ, Վրաստանի նախկին նախագահ Էդուարդ Շևարնաձեն գործող նախագահ Միխեիլ Սաակաշվիլիին խորհուրդ է տվել ազատ արձակել ձերբակալված իսրայելցի գործարարներին.
«Եթե ես լինեի Սաակաշվիլիի փոխարեն, ապա ներողություն կխնդրեի իսրայելցի գործարարներից և ազատ կարձակեի նրանց:
Ես կարծում եմ, որ նրանց դեմ կայացված դատավճռի ապացույցի բազան անբավարար է և թույլ: Իսրայելցի գործարարների ձերբակալությունը բացասական արձագանք է առաջացրել աշխարհում և անուղղելի վնաս է հասցրել Վրաստանի վարկին: Իսրայելցի գործարարներին ապօրինաբար ձերբակալողը հանցագործություն է գործել վրաց ժողովրդի նկատմամբ»:
Հիշեցնենք, որ իսրայելցի գործարարներ Ռոնի Ֆուքսն ու Զեև Ֆրենկելը ձերբակալվել էին 2010 թվականի հոկտեմբերի 14-ին Բաթում քաղաքում: Նրանք մեղադրվում էին Վրաստանի ֆինանսների փոխնախարար Ավթանդիլ Խարաիձեին 7 միլիոն դոլար կաշառք տալու մեջ:
Ապրիլի 1-ին Թբիլիսիի դատարանը իսրայելցի գործարարներ Ռոնի Ֆուքսին և Զեև Ֆրենկելին մեղավոր ճանաչեց պաշտոնատար անձին կաշառելու փորձի համար:
Ֆուքսը դատապարտվեց 7 տարվա ազատազրկման և 500,000 վրացական լարի (295,000 ամերիկյան դոլար) տուգանքի, իսկ Զեև Ֆրենկելը` 6.5 տարի ազատազրկման ու 100,000 վրացական լարի (60,000 ամերիկյան դոլար) տուգանքի: