Բրիտանական The Guardian պարբերականն իր հոդվածներից մեկը նվիրել է Ռուսաստանի նախագահ Վլադիմիր Պուտինի «պաշտոնական դիջեյին»: Խոսքը Ալեքս Մամոնովի մասին է, որը առավել հայտնի է որպես DJ Fenix: «Պարային երաժշտությունը Ռուսաստանում այնքան հանրաճանաչ է, որ արտիստներին հրավիրում են ելույթ ունենալ Կրեմլում»,- ասվում է հոդվածում:
Ինչպես նշում է պարբերականը` նոյեմբերին Մամոնովը դարձավ առաջին մարդը, որը որպես դիջեյ ելույթ ունեցավ Կրեմլում: Երաժշտի խոսքերով` իրեն առաջարկել էին ստեղծել միջոցառման հիմնը: Մամոնովն ինքը Ռուսաստանի նախագահին հանդիսատեսների շարքում չի տեսել, բայց «Պուտինը կարող էր լինել այնտեղ», ասվում է հոդվածում:
Պարբերականը նաև նշում է, որ դա DJ Fenix-ի առաջին ելույթն էր կառավարության անդամների համար: Մամոնովը, սակայն, չի ցանկանում տեղեկություն տալ այն մասին, թե ով է մտնում իր «երկրպագուների ակումբի» մեջ: Երաժիշտը խոստովանում է, որ իր երկրպագուների թվում նաև քաղաքական գործիչներ կան, սակայն նրա երկրպագուների «շրջանակը շատ լայն է»:
Հոդվածում նշվում է նաև, որ «կառավարության հետ ունեցած կապերը» դեռևս չեն վնասել Մամոնովի կարիերային, քանի որ նա ելույթ է ունենում Նյու Յորքից մինչև Իբիցա: Ինչ վերաբերում է «Պուտինի պաշտոնական դիջեյ» մականվանը`Մամոնովն ասել է, որ դա իրեն պետք չէ, քանի որ մինչ այդ էլ ինքը հայտնի էր իր երաժշտությամբ:
