«Չելսի»-«Մանչեսթեր Յունայթեդ»` Չեմպիոնների լիգայի ընթացիկ խաղարկության քառորդ եզրափակիչ միակ դիմակայությունը, որի ելքը կորոշվի պատասխան խաղից հետո:
Չնայած «Սթենֆորդ Բրիջ»-ում կայացած խաղում Ալեքս Ֆերգյուսոնի թիմը հաղթեց տանտերերին, սակայն «ազնվականներ»-ի ցուցադրած խաղն ու հաշվի նվազագույն տարբերությունը հույս են ներշնչում, որ այս դիմակայությունում ամեն ինչ դեռ առջևում է:
Հանդիպումը շատ ակտիվ սկսեց «Չելսի»-ն, որի կազմում առանձնահատուկ ուշադրության էին արժանի Ֆերնանդո Տորրեսի գործողությունները: Իսպանացու խաղը սկսել է ստացվել. նա անընդհատ ազատ դիրքերում էր հայտնվում և Վան դեր Սարին անհանգստացնելու առիթը բաց չէր թողնում: Ինչևէ, Տորրեսն այդպես չկարողացավ իրացնել բազմաթիվ հնարավորություններից և ոչ մեկը, իսկ «Յունայթեդ»-ի հարձակման առաջատար Ռունիին ընդամենը մեկ պահը բավականացրեց հաշիվը բացելու համար: 24-րդ րոպեին հիանալի կոմբինացիայի խաղարկումից հետո, Ռունին խփեց այս հանդիպման միակ գնդակը:
Անչելոտտիի սաներն ամենավտանգավոր պահը ստեղծեցին առաջին խաղակեսի վերջին րոպեին. Դրոգբայի սուր փոխանցումից հետո Տորրեսը շեղեց գնդակի ուղղությունը, սակայն այն ետ մղվեց դարպասաձողից ու հայտնվեց Լեմպարդի մոտ, ում հարվածից հետո էլ Պատրիս Էվրան դարպասային գծի վրայից հանեց գնդակը:
Երկրորդ խաղակեսում գոլեր չգրանցվեցին, սակայն այն չի կարելի դիտարժան չհամարել: Տորրեսը շարունակում էր զարմացնել իր հրաշալի խաղով, սակայն Վան դեր Սարը որսում էր այն ամենը, ինչ ընթանում էր դեպի «Յունայթեդ»-ի դարպասը: «Չելսի»-«Մանչեսթեր Յունայթեդ»` 0:1: Ամեն ինչ կորոշվի պատասխան խաղում: