Այսօր Վրաստանի իրավապահները պետք է հանդես գան պաշտոնական հայտարարությամբ` հրապարակելով անցած շաբաթ ծագած լրտեսական սկանդալի որոշ մանրամասներ: Բացահայտումների հրապարակման համար ընտրված օրը` նոյեմբերի 5-ը, Ռուսաստանում Ռազմական հետախույզի օրն է, իսկ վրաց իրավապահները պնդում են, որ իրենց կողմից բացահայտված լրտեսական ցանցը գործել է հենց Ռուսաստանի զինված ուժերի գլխավոր հետախուզական վարչության հովանու ներքո: Նոյեմբերի 5-ին նաեւ մեկնարկում են վրաստանյան ընդդիմության հանրավաքները, եւ վրաց փորձագետները նկատում են, թե այս օրը պատահական չի ընտրված` դա պատեհ առիթ կլինի ընդդիմությանը հակապետական գործունեության մեջ մեղադրելու համար:
Հիշեցնենք, որ այս շաբաթ հայտնի դարձավ, որ լրտեսական գործունեության մեջ մեղադրվող անձանցից առնվազն երկուսը Վրաստանի հայազգի քաղաքացիներ են: Բաթումցի գործարարներ Արմեն Գեւորգյանին եւ Ռուբեն Շիկոյանին վրաց իրավապահները մեղադրում են ուժային կառույցների մասին գաղտնի տեղեկատվություն հավաքելու փորձերի մեջ: Հետագայում հայտնի դարձավ, որ վրացական հատուկ ծառայությունները ձերբակալել են նաեւ Քոբուլեթիում գտնվող հյուրանոցներից մեկի աշխատակից Ռուսլան Գալոգրեին եւ Աջարիայի նախկին ղեկավար Ասլան Աբաշիձեի նախկին թիկնապահ Պետրե Դավրիշաձեին:
«Առաջին լրատվականին» տված հարցազրույցում օրերս Թբիլիսիի Հայկական ասամբլեայի համակոորդինատոր Առնոլդ Ստեփանյանը տեղեկացրել էր, որ ձերբակալված անձանցից մեկը` Արմեն Գեւորգյանը, Աջարիայի հայկական միության նախկին ղեկավարն է, մշտապես մտերիմ հարաբերությունների մեջ է եղել Աջարիայի նախկին իշխանությունների` Ասլան Աբաշիձեի հետ, եւ որոշակի հարաբերություններ ուներ Վրաստանի նախագահի` ազգային փոքրամասնությունների հարցերով խորհրդական Վան Բայբուրդի հետ: Ա. Գեւորգյանի ձերբակալությունը համընկավ Աջարիայում մեծ հեղինակություն ունեցող Էդուարդ Սուրմանիձեի ձերբակալության հետ: Է. Սուրմանիձեն Վրաստանի խորհրդարանի նախկին փոխխոսնակն էր եւ Զուրաբ Ժվանիայի ընկերը:
Ի դեպ, Վրաստանի իշխանություններին մոտ կանգնած «Ռուսթավի – 2» հեռուստաալիքը արդեն մի քանի օր է, ինչ գովազդում է նոր նկարահանված «Էնվեր» վավերագրական ֆիլմը, որը, ըստ հեղինակների, պատմում է վրացական հակահետախուզության հաջողությունների մասին:
