Վրացական Apsny.ge կայքի փոխանցմամբ, Վրաստանի փոխվարչապետ, եվրաինտեգրման հարցերով պետնախարար Գիորգի Բարամիձեն անդրադարձ է կատարել ՆԱՏՕ-ին Վրաստանի անդամակցության խնդրին.
«ՆԱՏՕ-ի գնահատմամբ, մենք առաջ ենք շարժվում անհրաժեշտ բարեփոխումների ճանապարհով: Դրանք որոշվում են մեր համագործակցության ամենամյա պլաններով: Մենք բավական արդյունավետ ենք օգտագործում ՆԱՏՕ-Վրաստան հանձնաժողովի մեխանիզմը`այդ ձևաչափով քննարկելով բոլոր այժմեական խնդիրները:
Տեխնիկական առումով Վրաստանը ՆԱՏՕ-ի անդամակցությանը պատրաստ կլինի արդեն 2-3 տարի անց: Աշնանը մենք Թբիլիսիում սպասում ենք ՆԱՏՕ-ի դեսպաններին: Հնարավոր է` այստեղ կայանա նաև Եվրատլանտյան խորհրդի հանդիպումը:
Ինչ վերաբերում է ՆԱՏՕ-ին Վրաստանի անդամակցության հարցում Ռուսաստանի ունեցած բացասական դիրքորոշմանը, ապա, եթե վերջինս հայտարարում է, որ ՆԱՏՕ-ին չի դիտարկում որպես սպառնալիք, եթե հյուսիսատլանտյան դաշինքը նրա համար վտանգ չի ներկայացնում, նույն տրամաբանությունից ելնելով` պետք է կարծել, որ ՆԱՏՕ-ի ընդլայնումը չպետք է մտահոգի Մոսկվային»:
Հիշեցնենք, որ ՆԱՏՕ-Վրաստան հանձնաժողովը ստեղծվել է 2008 թվականի սեպտեմբերին` որպես քաղաքական խորհրդատվության ու գործնական համագործակցության ֆորում, որը նպաստելու է ՆԱՏՕ-ին Վրաստանի անդամակցությանը: