Երեկ տեղեկացրել էինք, որ չնայած «Բարգավաճ Հայաստան» կուսակցության առաջնորդ Գագիկ Ծառուկյանի մամլո խոսնակ Իվետա Տոնոյանը «Ազատություն» ռադիոկայանի հետ զրույցում ասել էր, որ Ծառուկյանը Մոսկվայում հանդիպել է «Եդինայա Ռոսիա» կուսակցության ներկայացուցիչների հետ, սակայն «Եդինայա Ռոսիայի» մամլո քարտուղարը մեզ հետ զրույցում ասել էր, որ այդ հանդիպման մասին առաջին անգամ մեզանից է լսում:
Եվ ահա երեկ ԲՀԿ պատվիրակության` կուսակցության առաջնորդ Գագիկ Ծառուկյանի գլխավորությամբ, Մոսկվա այցելությանն անդրադարձել է Московская правда-ն՝ գրելով, որ իրավիճակին ծանոթ փորձագետներին տարօրինակ է թվացել, որ ո’չ Գագիկ Ծառուկյանը, ո’չ էլ նրա կուսակիցները չեն գովազդել նման ինտրիգային այցելության փաստը՝ ներքաղաքական դաշտում ԲՀԿ-ի վերջին ակտիվ գործողությունների ֆոնին: Ապա թերթը պարզաբանում է, որ ռուսական քաղաքական վերնախավի ներկայացուցիչներից ԲՀԿ-ին հաջողվել է հանդիպել միայն ԱՊՀ-ի հարցերով Պետդումայի կոմիտեի նախագահ Լեոնիդ Սլոիցկիի հետ, որի միջոցով ռեզոնանսային և հաղթական գովազդ Հայաստանում հնարավոր չէր անել:
«Այսպիսով՝ Ծառուկյանի` ռուսաստանյան բարձրաստիճան դեմքերի հետ հանդիպելու աղոտ հույսերը, նաև Ռոբերտ Քոչարյանի մոսկովյան կապերը վերջնական ֆիասկո են ապրել: Ծառուկյանը Հայաստան է վերադարձել ձեռնունայն և Մոսկվայի փաստացի ակնարկով առ այն, որ մոտ ապագայում ԲՀԿ-ն երկրի ներքաղաքական դաշտում կարող է միայն երկրորդական դերի հավակնել»,- գրում է Московская правда-ն: