Տեխաս նահանգի դատարանը հունվարի 29-ին մինչև 2013 թ. ապրիլը հետաձգել է Քիմբերլի Մակքարթիի մահապատիժը։ Նա կարող էր դառնալ երեք տարվա ընթացքում առաջին կինը, որը մահապատժի է ենթարկվել ԱՄՆ-ում,- հաղորդում է Agence France-Presse-ը:
Ի սկզբանե մահապատիժը նշանակվել էր հունվարի 30-ին: Թե ինչ պատճառով է մահապատժի իրականացումը հետաձգվել՝ չի հաղորդվում:
Ավելի վաղ Մակքարտիի փաստաբանները խնդրել են դատարանին մահապատիժը 30 օրով հետաձգել, քանի որ, նրանց կարծիքով, դատարանի որոշման վրա ազդել են ռասայական նախապաշարմունքները: Սևամորթ Մակքարթին դատապարտվել է մահապատժի սպիտակամորթ 70-ամյա ուսուցչուհի Դորոթի Բուտի սպանության համար:
Փաստաբանների խոսքերով՝ դատարանի կողմնակալության մասին է վկայում այն հանգամանքը, որ լսումներին միայն մեկ սևամորթ ատենակալ կար, չնայած նրան, որ Դալասում, որտեղ տեղի է ունեցել հանցագործությունը, բնակչության 22,5%-ը սևամորթներ են:
51-ամյա Մակքարթին սպանության համար մահապատժի է դատապարտվել 1998 թ.: Վճիռը բողոքարկվել է, և նա կրկնակի դատապարտվել է 2002 թ.: Ըստ հետաքննության տվյալների՝ 1997 թ. նա մտել է իր հարևանուհի Դորոթի Բուտի տուն, երեք անգամ լուսամփոփով հարվածել նրա գլխին, հետո կտրել է այն մատը, որի վրա ադամանդե քարով մատանի է եղել: Այնուհետև սպանվածի ավտոմեքենայով նա մեկնել է քաղաք, որտեղ փորձել է կոկային գնել: Նա մի քանի անգամ օգտվել է Բուտի վարկային քարտից և գրավ դրել նրա մատանին: Բացի այդ, Մակքարտին մեղադրվում է ևս երկու տարեց մարդու սպանության համար:
Եթե Մակքարթիին մահապատժի ենթարկեն, ապա նա կլինի 13-րդ կինը, որը մահապատժի է ենթարկվել 1997 թվից ի վեր, երբ ԱՄՆ-ում վերականգնվել է այդ պատժամիջոցը:
