Փետրվարի 12-ին դատական ակտերի հարկադիր կատարման ծառայողները այցելելու են Չփլախյաններին՝ նրանց հարկադրաբար տնից վտարելու համար: Ութ անձից բաղկացած երկու ընտանիք կհայտնվեն փողոցում, եթե փետրվարի 11-ին Էրեբունի և Նուբարաշեն վարչական շրջանների ընդհանուր իրավասության դատարանը չբավարարի քաղաքացու միջնորդությունը և չկասեցնի վտարման գործընթացը:
«Պատկերացնո՞ւմ եք այն զինվորի հոգեվիճակը, որը գնացել է իր հայրենիքը պաշտպանելու և տեղեկանում է, որ իր ընտանիքին շպրտել են փողոց… Այսպիսով թուլացնում են մեր բանակի թիկունքը, որովհետև Սիրանուշի որդին ունի բազմաթիվ զինակից ընկերներ, որոնք ևս տեղեկանալու են, թե Հայաստանում զինվորի ընտանիքի հետ ինչպես են վարվում… Այսքանից հետո այդ զինվորներն ի՞նչ սրտով են կռիվ տալու հակառակորդի դեմ»,- հռետորական հարց է հնչեցնում «Վելես» հասարակական կազմակերպության նախագահ Մարինա Պողոսյանը, ով ներկայացնում է Չփլախյանների ընտանիքի շահերը:
Հիշեցնենք, որ Սիրանուշ Չփլախյանը խաբեության զոհ էր դարձել և իր ու քրոջ ընտանիքին պատկանող անշարժ գույքի վերաբերյալ կեղծ առքուվաճառքի պայմանագիր էր կնքել, որով էլ երկու սեփական տներն անցել են կառավարության արդեն նախկին աշխատակից Նունե Պլուզյանի մորաքրոջ որդուն: Չփլախյանները բազմիցս դիմել էին ՀՀ կառավարությանը՝ կոչ անելով զսպել իրենց աշխատակցի ախորժակը և իրենց չզրկել վերջին կացարանից: Պլուզյանի ախորժակը, սակայն, զսպել հնարավոր չեղավ, ու թեև այս տարվա սկզբից նա այլևս չի աշխատում կառավարությունում, դա չօգնեց Չփլախյաններին՝ խուսափելու սեփական տնից վտարվելու վտանգից:
Երկու ընտանիքների վերջին հույսը առաջիկա դատական նիստն է և դատավար Տաթևիկ Ստեփանյանի կայացրած որոշումը:
Մանրամասները՝ տեսանյութում: