Վրացական Apsny.ge կայքի փոխանցմամբ, Կոնգոյում կործանված վրացական Аirzena ավիաընկերությանը պատկանած Bombardier CRJ-200 ինքնաթիռի վթարի պատճառ կարող էր լինել բարձրաչափի անսարքությունը:
Վրացական պաշտոնատար անձինք հրաժարվում են մեկնաբանել ինքնաթիռի կործանման պատճառների շուրջ այս վերջին վարկածը՝ պատճառաբանելով, թե օդանավի կործանման հետաքննությունը դեռ նոր է սկսվել:
Ներկայումս Կոնգոյում գտնվող վրացիները տեղեկատվություն են տարածել, ըստ որի` ավիավթարի պատճառը բարձրաչափի անսարքությունն է: Այդ վարկածի համաձայն, բարձրաչափը վերջին րոպեին ցույց է տվել, թե ինքնաթիռը գտնվում է 400 մետր բարձրության վրա, ինչն էլ մոլորության մեջ է գցել ինքնաթիռի անձնակազմին:
Վերջինս սկսել է կտրուկ իջեցնել ինքնաթիռը, որը, ինչպես պարզվել է հետագայում, այդ պահին գտնվել է գետնից ոչ թե 400, այլ ընդամենը մի քանի մետր բարձրության վրա: Դրա համար էլ ինքնաթիռը ողջ ուժով խրվել է գետնի մեջ ու այրվել:
Նշվում է, որ այս վարկածի հեղինակը օդանավի անձնակազմի հայ կապիտան Ալեքսեյ Հովհաննիսյանն է, որը հիվանդանոց հասցվելուց հետո մահացել է:
Հիշեցնենք, որ երեկ վրացական «Ռուսթավի-2» հեռուստաընկերությունը հայտնել էր օդանավի անձնակազմի Վրաստանի չորս քաղաքացիների ինքնությունը. անձնակազմի հրամանատար Ալեքսեյ Հովհաննիսյան, օդաչու Դավիթ Ցուցկիրիձե, անձնակազմի անդամ Գուրամ Կեպուլաձե, տեխնիկական սպասարկող Ալբերտ Մանուկով: