ՄԱԿ-ում Ռուսաստանի մշտական ներկայացուցիչ Վիտալի Չուրկինը կոչ է արել ՆԱՏՕ-ի ղեկավարությանը փոխել քաղաքականությունը Աֆղանստանում: Չուրկինը հայտարարել է, որ ՆԱՏՕ-ի զորքերի` գրոհայինների դեմ մղած մարտերն ամբողջովին չեն վերացնում խնդիրը, այլ թույլ են տալիս այդ ուժերին` պահպանել իրենց մարտունակությունը եւ փոխել իրենց դիրքերն ու տեղափոխվել երկրի տարբեր մասեր: Ըստ Չուրկինի` հիմա լարվածությունը մեծանում է երկրի հյուսիսային շրջաններում:
«Ռուսաստանը եւ Հավաքական անվտանգության կազմակերպության անդամ երկրները կարծում են, որ հակաահաբեկչական գործունեությունը պետք է, նախ եւ առաջ, ուղղված լինի ահաբեկիչների եւ էքստրեմիստների վերացմանը»:
Նա նաեւ կոչ է արել ավելի խիստ պայքար մղել թմրանյութերի տարածման դեմ, քանի որ թմրանյութերի առեւտուրը ահաբեկիչների ֆինանսավորման հիմնական աղբյուրն է: Այս մասին գրում է RBC-ն:
