Թուրքական Cihan լրատվական գործակալության փոխանցմամբ, Թուրքիայի արտգործնախարարությունը մի հայտարարություն է տարածել, որում իր խորին մտահոգությունն է հայտնել վերջին շրջանում արտերկրում հայերի կողմից թուրքերի վրա գործած հարձակումների ավելացման առնչությամբ.
«Վերջին շրջանում հաճախակիացել են հայկական մի շարք խմբերի կողմից արտերկրում մեր երկիրը ներկայացնելուն ուղղված միջոցառումների դեմ իրականացված հարձակումները: Դրա վերջին օրինակները գրանցվեցին Բեյրութում կազմակերպված տեքստիլ արտադրանքի և Փարիզում կազմակերպված գրքի միջազգային ցուցահանդես-վաճառքների ժամանակ:
Ներկայումս արմատական ազգայնական մտածելակերպի հիման վրա իրականացվող այդ հարձակումները նախկինում էլ իրականացվում էին «ահաբեկչությունների» միջոցով: Մենք ակնկալում ենք, որ բոլոր այն երկրներում, որտեղ իրականացվել են այդօրինակ հարձակումներ ու հանցագործություններ, դրանց հետ կապված հետաքննություն կձեռնարկվեն, և ջանքեր կգործադրվեն նմանատիպ դեպքերի կանխման համար»:
Հիշեցնենք, որ ոչ վաղ անցյալում արտգործնախարար Ահմեդ Դավութօղլուն հայտարարել էր, որ, Հայաստանի հետ երկխոսություն ձեռնարկելով, իրենք 3 նպատակ են հետապնդում. Հայաստանի հետ հարաբերությունների կարգավորում, Հայկական սփյուռքի հետ հարաբերությունների կարգավորում և, վերջապես, համայն աշխարհում հայերի ու թուրքերի միջև նորմալ հարաբերությունների ձևավորում: