Ռուսաստանյան REGNUM գործակալության փոխանցմամբ` մոտ օրերս Վրաստանում շահագործման կհանձնվի 223 կմ երկարությամբ նոր մայրուղին, որը կապում է Քվեմո-Քարթլիի եւ Սամցխե-Ջավախքի շրջանները։ Երկրի իշխանությունները կարծում են, որ ճանապարհը ոչ միայն տնտեսական, այլ նաեւ քաղաքական նշանակություն ունի։ Դեպի Հայաստանի ու Թուրքիայի հետ Վրաստանի պետական սահմանները տանող Թբիլիսի-Ծալկա-Նինոծմինդա-Ախալքալաք-Կարծախ ավտոճանապարհը ԱՄՆ Millenium Challenges Corporarion-ի պետական ծրագրով վերանորոգելու նպատակով հատկացվել է 203 մլն դոլար։ Նախագծի շրջանակներում կառուցվել է 15 նոր կամուրջ։ Ճանապարհի շինարարությունը սկսվել է 2008թ. գարնանը։ «Նոր ճանապարհի շնորհիվ մենք իրոք կրկին բացել ենք Սամցխե-Ջավախքի ներուժը, որը թեեւ միատարր կերպով բնակեցված է վրացահայերով, ոչ բարվոք ճանապարհի պատճառով մնացած Վրաստանից գրեթե ամբողջությամբ անջատված էր, և մարդկանց համար ավելի հեշտ էր հարաբերություններ հաստատել հարևան Հայաստանի հետ և այնտեղ արտահանել իրենց մթերքը»,-ասել է Վրաստանի նախագահ Միխեիլ Սահակաշվիլին։
