Կոտ դ’Իվուարի նախկին նախագահ Լորան Գբագբոն, որը չէր ցանկանում աթոռը հանձնել ընդդիմության ներկայացուցիչ, նախորդ տարվա նոյեմբերին նախագահական ընտրություններին հաղթած Ալասանա Ուատտարային, որոշում է կայացրել հանձնվել ընդդիմությանը: Այս մասին հաղորդում է France Presse գործակալությունը:
Ուատտարայի օգնական Ալլի Կուլիբալիի խոսքերով` ապրիլի 5-ին Գբագբոն ընդդիմության ներկայացուցիչների հետ նստել է բանակցությունների սեղանի շուրջ: Կուլիբալին ավելացրել է, որ Գբագբոն այս հնարավորության մասին խոսում էր արդեն նախօրեին: Տեղեկություններ կան, որ այսօր ընդդիմության կողմից Աբիջանում նախագահական նստավայրը գրավելուց հետո Գբագբոն արգելափակված է մնացել նստավայրի տակ գտնվող թաքստոցում: Բանակցությունների փաստը հաստատում է նաև The new York Times-ը:
Հիշեցնենք, որ այսօր գիշեր ընդդիմությանը հաջողվել է վերահսկողություն հաստատել երկրի տնտեսական մայրաքաղաք Աբիջանի նկատմամբ` գրավելով նախագահական նստավայրը: Նախորդ օրը Գբագբոյի կողմնակիցների դիրքերը սկսել են ռմբակոծել նաև ՄԱԿ-ի ուղղաթիռները:
