Մենք դատապարտում ենք Փարիզում տեղի ունեցած ահաբեկչությունը, սակայն կոնկրետ ՀՀԿ երիտասարդական թևը Ֆրանսիայի դեսպանատան առջև որևէ ակցիա չի կազմակերպում: Այս մասին մեզ հետ զրույցում նշեց ՀՀԿ երիտթևի ղեկավար, ԱԺ պատգամավոր Կարեն Ավագյանը:
«Շատ երիտասարդներ գիտենք, որ պատրաստվում են Ֆրանսիայի դեսպանատան մոտ իրենց դատապարտող երթը կամ մասնակցությունն ունենալ, բայց կոնկրետ ՀՀԿ-ի երտասարդական թևը նման ակցիա չի կազմակերպում: Ես փորձելու եմ դա ինչ-որ կազմակերպված ձևով անել. մեր երիտասարդները, ընկերները, երիտասարդ պաշտոնյաները, որոնք կցանկանան, միասին կայցելենք դեսպանատուն: Այս պահին դեռ մտածում ենք, թե ինչպես դա կազմակերպել: Մեծ մասշտաբային բան այս պահին չունենք նախատեսած, բայց հավատացնում եմ, որ ինչ-որ կերպ կկազմակերպենք: Անձամբ ես ուզում եմ մասնակցել դրան»,- ասաց Ավագյանը:
Դիտարկմանը, թե Վրաստանի քաղաքացիներն այդ առումով բավական ակտիվ էին, մեծ մոմավառություն է տեղի ունեցել, բազմաթիվ մարդիկ են այցելել ու իրենց աջակցությունը հայտնել Ֆրանսիային, մինչդեռ մեզ մոտ շատ քիչ էին Ֆրանսիայի դեսպանատուն այցելողները, ինչո՞վ է սա պայմանավորված, Կարեն Ավագյանը պատասխանեց. «Դա պայմանավորված է ոչ թե նրանով, որ հայերն ավելի քիչ են դատապարտում կամ ավելի թեթև են տարել տեղի ունեցածը, այլ նրանով, որ մեր հանրապետությունում արձակուրդային վիճակ է: Հավատացած եմ, որ թե՛ մեր երիտասարդական կառույցները, թե՛ մեր մնացած քաղաքացիները ոչ պակաս են ցավում ու դատապարտում տեղի ունեցածը, քան այն երկրները, որոնց մասին դուք նշեցիք:
Ամենևին էլ որևէ ակցիայով չի պայմանավորված այն ցավը, որ ապրում է ցանկացած բանական մարդ՝ տեսնելով նման սարսափելի ահաբեկչությունը: Անկախ նրանից, թե ինչի համար է արվել այդ արարքը, այն դատապարտելի է»,- ընդգծեց ՀՀԿ երիտթևի ղեկավարը:
Արևելագետ, Քաղաքացիական պայմանագրի կառավարման խորհրդի անդամ Արայիկ Հարությունյանը, որն այցելել էր Ֆրանսիայի դեսպանատուն և իր զորակցությունը հայտնել, «Առաջին լրատվական»-ի հետ զրույցում նշեց, որ ահաբեկչության օրը՝ երեկոյան, մի քանի ընկերներով ֆեյսբուք սոցիալական ցանցերում կոչ արեցին, որ օրվա ընթացքում ովքեր ցանկանում են ցավակցություն հայտնել ֆրանսիացի ժողովրդին, պարզապես այցելեն դեսպանատուն և իրենց կարեկցանքը հայտնեն ֆրանսիացի ժողովրդին:
«Ցավոք սրտի, թե՛ ֆեյսբուքում, թե՛ փողոցում շատ քչերն արձագանքեցին դրան: Ոմանք դա բացատրում էին նրանով, որ ՀՀ-ն ներքին կյանքում շատ ավելի լուրջ խնդիրներ ունի, ոմանք ասում էին, որ աշխարհում ավելի լուրջ պրոցեսներ են տեղի ունենում, և դրանց պետք է արձագանքել: Կարծում եմ, որ կարևորագույն քայլ է փաստել, որ ցանկացած լրագրողի նկատմամբ նման ոտնձգությունը պետք է դատապարտվի ամբողջ աշխարհում: Ես ինքս էլ մի բանաձև ունեմ. «Եթե ամբողջ աշխարհում պետք է բոլորը սպանվեն, ապա վերջինը պետք է սպանվեն լրագրողները»,- հավելեց նա:
Հասարակության անտարբերությունը տեղի ունեցածի շուրջ զրուցակիցս պայմանավորում է նախ այն հանգամանքով, որ մեր հասարակությունը խոսքի ազատության արժեքը շատ վատ է պատկերացնում կամ չի գնահատում: Երկրորդ՝ ընդհանուր հասարակական-քաղաքական պասիվ զարգացումներով է պայմանավորված: «Մենք նմանատիպ իրավիճակների շատ ենք ականատես եղել: Այն, ինչ կապված է մամուլի հետ, սկսած 2001-ից, երբ Ա1+-ը փակվեց, մենք նմանատիպ թույլ արձագանք տեսանք հասարակության կողմից, հետագայում նաև բռնություններ եղան լրագրողների նկատմամբ՝ դաձյալ թույլ արձագանքով: Սա, կարծում եմ, պայմանավորված է խոսքի ազատության նկատմամբ մեր հասարակության արժեքի թույլ գիտակցմամբ»,- ասաց Արայիկ Հարությունյանը:
Իշխանությունների թույլ արձագանքը կատարվածին արևելագետը պայմանավորում է նրանով, որ այսօր իշխանությանն այնքան էլ ձեռնտու չէ՝ ազատ խոսքի գիտակցումը հասարակության կողմից ավելի բարձր մակարդակի լինի:
«Առհասարակ, մամուլի նկատմամբ ամբողջ աշխարհում ճնշումները մեծանում են: Այդ մասին են վկայում բազմաթիվ վերլուծությունները: Օրինակ՝ անցյալ տարի ավելի շատ լրագրող է սպանվել աշխարհում, քան նախորդ տարիներին: Սրա պատճառն այն է, որ ամբողջ աշխարհում ԶԼՄ-ները սկսում են ավելի մեծ դեր խաղալ հանրային քաղաքական կյանքում, քանի որ նոր տեխնոլոգիաներն ավելի մեծ հնարավորություններ են տալիս դրա համար: Երկրորդ՝ սա նոր երևույթ չէ, երբ իսլամիստները տարբեր սպառնալիքների միջոցով փորձում են զսպել հատկապես եվրոպական մամուլի ներկայացուցիչներին: Հիշենք, որի 2-3 տարի առաջ դանիական և ֆրանսիական մամուլում ծաղրանկարներ հրապարակվեցին Մուհամեդ մարգարեի պատկերով, ինչը լուրջ դժգոհություններ առաջացրեց հատկապես մուսուլմանական երկրներում: Սա նորից գալիս է փաստելու, որ մուսուլմանական երկրներում՝ հատկապես արաբական արևելքի երկրներում, խոսքի ազատության արժեքի նկատմամբ վերաբեմունքը բավականին ցածր և չգիտակցված մակարդակում է գտնվում»,- հավելեց արևելագետը:
