Սոցիոլոգ Ահարոն Ադիբեկյանի գնահատմամբ դեռևս հարց է, թե կկարողանա՞ «Ժառանգություն» կուսակցությունը պահպանել այս բարձրացրած ալիքը, որը նրանք սկսել են, քանզի խորհրդարանական ընտրություններին դեռևս մեկ տարի կա: Սոցիոլոգի կարծիքով վարկանիշը բարձրացնելու մասին խոսելն ավելորդ է, այսօր «Ժառանգությունը» պետք է մտածի իր հաջորդ քայլերի մասին, որպեսզի կարողանա գոնե պահպանել սեփական վարկանիշը:
«Կարող են էլի հնարքների գնալ, ասենք այս անգամ էլ ֆրակցիայով հացադուլ հայտարարեն, կամ էլ վայր դնեն իրենց պատգամավորական մանդատները»,- «Առաջին լրատվականի» հետ զրույցում կարծիք հայտնեց Ադրբեկյանը:
Նրա գնահատմամբ, Հայ ազգային կոնգրեսի քայլերը, ուղղված ըմբոստ էլեկտորատի ձայները իրենց կողմ քաշելուն, այսօր բավականին նշանակալի են և շատ քիչ շանսեր են տալիս «Ժառանգությանը» ներկայանալու որպես ըմբոստ կամ ընդդիմադիր էլեկտորատի կարծիքը հայտնող քաղաքական ուժ: «Նրանք պետք է իրենց տեղը գտնեն, քանզի ՀԱԿ-ն արդեն ծայրահեղ ընդդիմությունից շարժվել է դեպի կենտրոն և նպատակ ունի մաբողջ ընդդիմադիր դաշտն ընդգրկի և ինչու ոչ իշխանամետ ձայների մի մասն էլ քաշի իր կողմը: Այս պարագայում հարց է ծագում, թե ՀՅԴ-ին և Ժառանգությանը, էլ չեմ ասում մյուս` չորրորդ կարգի կուսակցություններին ինչ կհասնի»,- նշեց սոցիոլոգը:
Ադիբեկյանի կարծիքով, Րաֆֆի Հովհաննիսյանի հացադուլը հուսալքության մի քայլ էր և մեկ տարի հետո դա կդիտվի որպես անեկդոտ, ոչ թե որպես լուրջ քաղաքական քայլ, որովհետև սոցիալական հիշողությունը բավականին թույլ է և անընդհատ ազդակներ են պետք, որպեսզի հանրային գիտակցության մեջ այդ ամենը պահպանվի. «Օրինակ` ՀԱԿ-ի անընդհատ հանրահավաքները կոչված են հենց նրան, որ հանրային գիտակցության մեջ ՀԱԿ-ի պատկերը և կարգախոսները պահպանվեն: Բայց Րաֆֆի Հովհաննիսյանն հո չի կարող երեք ամիսը մեկ հացադուլ հայտարարի, որովհետև դա արդեն ծաղրանք կդիտարկվի սեփական անձի նկատմամբ»,- եզրափակեց Ադիբեկյանը: