Այս տարվա ձյունը 10 օրով ուշացավ, և արդեն լուրջ անհանգստություն կար՝ հողի խոնավության հետ կապված: Այս մասին «Առաջին լրատվական»-ի հետ զրույցում հայտնեց «Հայաստանի ագրարագյուղացիական միավորում» ՀԿ նախագահ Հրաչ Բերբերյանը՝ հավելելով, որ այս պահին գյուղատնտեսական տարին կարգավորվում է:
Նրա խոսքով՝ ձյունն ուշացավ, սակայն գյուղատնտեսությունն այս պահի դրությամբ վտանգված չէ: Հեռուսատեսությամբ եթեր հեռարձակված որոշ դիտարկումների հետ Բերբերյանը չհամաձայնեց, քանի որ որոշ բույսերի բողբոջակալումն ու խոտի փոքրիկ կանաչ ծածկը դեռ չեն նշանակում, որ ցրտահարման և այլ վտանգներ կան:
«Ավելի մտահոգիչ է գյուղատնտեսական տարվա համար ջրամբարների լցման և հեղեղման հարցը: Կարծում եմ՝ նախարարությունն այս հարցով պետք է դիմի կառավարությանը»,- նշեց Բերբերյանը:
Գյուղատնտեսության փոխնախարար Գառնիկ Պետրոսյանն «Առաջին լրատվական»-ի հետ զրույցում անդրադառնալով ջրամբարների խնդրին՝ նկատեց, որ այս տարի իրենց խնդիրն այն է, որ տեղումների մակարդակը այնքան լինի, որպեսզի դրանք լցվեն, իսկ հակառակ դեպքում նախարարությունն ունի համապատասխան հնարավորություններ՝ հեղեղումներից խուսափելու համար:
«Բողբոջակալել են միայն դեկորատիվ ծառատեսակները՝ վարդը, յասամանը, պտղատու ծառերին վնաս չի սպառնում, ծիրանենիներին՝ նույնպես: Ինչ վերաբերում է հացահատիկային մշակաբույսերին, առանց ձյան շերտի նրանք կարող են չցրտահարվել մինչև -14, -16 աստիճանի դեպքում, իսկ ահա ձյան շերտի դեպքում ոչ մի անհանգստություն չկա»,- նկատեց փոխնախարարը:
Վերջինս հավելեց, որ շատ կարևոր է ձյան տեսքով տեղումներն առատ լինեն, իսկ գյուղացիները չպետք է անհանգստանան, որովհետև այս օրերին նախարարության տարածքային կենտրոններն իրենց աշխատանքն իրականացնում են բարեխղճորեն:
Հավելենք, որ հունվարի 9-ին շրջանների զգալի մասում սպասվում են տեղումներ՝ ձյան տեսքով: Օդի ջերմաստիճանը հունվարի 9-10-ին աստիճանաբար կնվազի 10-12 աստիճանով: