Բանկային համակարգում տոներից հետո աշխուժություն չի լինի, քանի որ դրամի արժեզրկումն ու դեֆիցիտը շարունակվում են և նոր խնդիրներ ստեղծում տնտեսության բնականոն զարգացման համար: Այս մասին «Առաջին լրատվական»-ի հետ զրույցում հայտնեց բանկային մասնագետ Արարատ Ավագյանը՝ հավելելով, որ երկրի բոլոր ենթակառուցվածների հետ միասին բանկային համակարգը ևս սպասողական վիճակում է:
Մեր հոդվածներից մեկում մենք արդեն անդրադարձել էինք, որ արժույթի ճնգաժամին հետևում է բանկային համակարգի ճգնաժամը-, քանի որ բանկոմատներից կանխիկացման, բանկերից դրամային ավանդային պայմանագրերի խզման, հիփոթեքային և ավտովարկերի, սպառողական վարկերի մասով բանկային գործարքները կա՛մ դժվարացել են, կա՛մ կասեցվել:
Բանկային համակարգի մասնագետը համոզված է, որ բանկերը տոներից հետո հնարավոր է փոքր ծավալի գործարքներ անեն, սակայն բնակչության ամբողջ վարկային պահանջարկը չեն կարող սպառել: «Սա հասկանալի վարքագիծ է բանկերի կողմից, նրանք կսպասարկեն միայն անթերի վարկային պատմություն ունեցող իրենց մշտական հաճախորդներին, և ռիսկերի գնահատումն է կլինի ավելի մանրամասն, որը երբեմն չի բխի հաճախորդի շահերից»:
Ավագյանը նկատեց, որ բանկերը նոր խաղի կանոններ կսահմանեն, որն այս պարագայում հնարավոր է՝ համադրելի չլինի մարդկանց դրամային եկամուտներին, և այդ վարկերի սպառողական պահանջարկը կընկնի: Ըստ մասնագետի՝ չի բացառվում, որ փոքր կապիտալով որոշ բանկեր չեն կարող երկար աշխատել ստեղծված պայմաններում. «Բանկերի անուններ չեմ կարող տալ, որովհետև չգիտեմ՝ ինչպիսին է նրանց ճգնաժամային կառավարման մոդելը և ռեսուրսային կարողությունները: Կարող եմ միայն ասել, որ անգործության պարագայում որոշ վարչություններ կարող են փակվել, բանկային որոշ աշխատակիցներ կարող են մնալ առանց աշխատանքի: Սա ավելի մտագոհիչ է, քան զուտ բանկերի սնանկացումը»:
Ինչ վերաբերում է ավանդներին, Ավագյանը հայտնեց, որ քաղաքացիների ավանդների մինչև 4 մլն դրամը երաշխավորված է Ավանդների հատուցումը երաշխավորող հիմնադրամի կողմից, ավելի մեծ ավանդների համար հարցը բավականին լրջանում է: «Իսկապես չեմ կարող ասել՝ որն է ճիշտ՝ թողնե՞լ ավանդը վանկում, թե՞ հանել: Առավել ևս խնդիր է եղած բանկից հանած դրամի կանխիկ պահպանումը: Զարգացումները կտրուկ են, չեմ կարող ասել՝ որն է ճիշտ: Հնարավոր է՝ ամիսներ անց իրավիճակը սկսի կայունանալ. պատասխանատու քայլ է մարդկանց հստակ գործողությունների մղելը»,- ասաց մասնագետը:
Նրա խոսքով՝ բանկային աշխատանքի կոլապսն իր բացասական ազդեցությունը կունենա տնտեսության բոլոր ուղղությունների վրա, որովհետև վերջին տարիների փոքր դրական տեղաշարժը բանկային գործարքների թափանցիկության ու մատչելիության հետևանքն էր:
«Ես գրեթե չգիտեմ ընտանիք, որ բանկային պարտավորություններ չունենա: Հիփոթեք, ավտովարկ, սպառողական վարկ, ուսման վարկ և այլն. ահա թե ինչպես էր առևտրային շուկան ապրում»,- ընդգծեց մասնագետը: