Տոները դեռ ընթացքի մեջ են, սակայն շուկաներն այսօրվանից՝ հունվարի 5-ից, սկսել են աշխատել: Ամանորյա առևտրից առևտրականների սպասելիքները չարդարացան, այդ իսկ պատճառով նրանք վաճառքը վերսկսել են ժամանակից շուտ:
Տոներից հետո հիմնականում մարդիկ գնում են հաց, լավաշ, կաթնամթերք: Մնացած ապրանքների պահանջարկ այս պահին դեռ չկա, ուստի որոշ վաճառողներ իրենց թույլ են տալիս տոները տանը երկար վայելելու հաճույքը:
«Առևտուր եղավ միայն վերջին երկու օրը, իսկ այդ գումարով մենք չկարողացանք անգամ մեր տոնական սեղանը լցնել: Որոշել ենք շուտ սկսել, հնարավոր է՝ էլի մարդիկ գոնե կանաչի, մրգեր, ձուկ գնեն»,- ասաց Մալաթիայի շուկայում աշխատող տիկին Լենան:
Վաճառականները միաբերան շուկայի պասիվ վիճակը պայմանավորում են դրամի արժեզրկմամբ. «Երբեք նման բան չէր եղել, մարդիկ գալիս էին, մեկ կիլո, երկու կիլո գնում կամ միայն գներին ծանոթանում: Համեմատաբար վաճառք եղավ դեկտեմբերի 30-ին, 31-ին, մարդիկ այդ օրերին կամ աշխատավարձ ստացան, կամ դոլար մանրեցին»:
Առավել մանրամասն՝ տեսանյութում։