Նավթի ցածր գները կարող են արմատական փոփոխությունների պատճառ դառնալ ռուսական տնտեսության մեջ: Այս մասին The Nation պարբերականում գրում է Մասաչուսեթսի համալսարանի տնտեսագիտության պրոֆեսոր Դևիդ Քոթցը:
Հեղինակը նշում է, որ նավթային շուկայում ներկայիս դրությունը ռիսկային է ռուսական տնտեսության համար, որը զգալիորեն կախված է նավթագազային արտահանությունից:
Նավթի ցածր գների երկարատև պահպանումը, սակայն, կարող է արմատապես փոխել ռուսական տնտեսությունը: Քոթցի կարծիքով` իրադարձությունների զարգացման 3 սցենար է հնարավոր:
Առաջին դեպքում Ռուսաստանը կշարունակի հենվել էներգետիկ պաշարների արտահանման վրա`ամրապնդելով հարաբերությունները Չինաստանի հետ, որը հումքի ավելի ու ավելի շատ կարիք ունի: Այս տարբերակը համաշխարհային համակարգին լուրջ սպառնալիք կարող է դառնալ, որտեղ դեռևս գերիշխում է ԱՄՆ-ը:
Երկրորդ դեպքում հնարավոր է ռուսական տնտեսության աստիճանաբար տրանսֆորմացում` առաջնային ոլորտների զարգացման ճանապարհով: Ռուսաստանը կարող է դա անել` հենվելով իր գիտական լուրջ պաշարների վրա: Նման դեպքում բնական ռեսուրսների վաճառքներից ստացված եկամուտները պետք է ծախսվեն տնտեսության զարգացման վրա:
Երրորդ սցենարը ենթադրում է արմատական անցում դեպի սոցիալիզմի ժողովրդավարական ձևի կառուցում: Սակայն նման նախաձեռնությունը համապատասխան զանգվածային շարժում և քաղաքական կուսակցություն կպահանջի, որը կկարողանա գլխավորել այդ շարժումը: