«Շատ բան չհասցրինք իրականացնել: Մենք առայժմ Ղարաբաղի խնդրում չենք կարողացել հասնել այնպիսի վիճակի, որ մեր հարևանը ի վերջո սթափվի, հասկանա, որ մեր խնդիրը միայն խաղաղ ճանապարհով պետք է լուծվի, որ մեր հակառակորդը չկրակի մեր սահմաններին, և խաղաղ պայմաններում մեր զինվորները չզոհվեն: Սա ոչ թե մեր թերացումն է, այլ պատմականորեն մեր բախտը չի բերել. մենք ունենք այնպիսի հակառակորդ, որը չի հասկանում որևէ լեզու և շարունակում է իր ռազմատենչ պահվածքով մեր սահմանները անհանգիստ պահել: Եվ մենք չկարողացանք հասնել նրան, որ մեր սահմանները խաղաղ լինեն»,- ամփոփելով 2014-ը՝ նշեց ԱԺ ՀՀԿ խմբակցության պատգամավոր Մարգարիտ Եսայանը:
Մարգարիտ Եսայանը հույս ունի, որ ԵՏՄ պայմանագրի իրականացման ճանապարհին սոցիալական որոշ շերտերի կյանքն ավելի կլավանա, քանի որ այս պայմանագիրը ունի հենց դրան միտված կետեր:
«Ես ժողովրդին 2015-ին համբերություն չեմ մաղթելու, ես չեմ սիրում համբերություն բառը, ես չեմ սիրում, երբ մարդը չափազանց համբերատար է: Ես ավելի շարժուն գաղափար եմ ուզում մեր ժողովրդին մաղթել: Ես լավատեսություն և ակտիվություն եմ մաղթում ժողովրդին, որ կարողանան տեր լինել իրենց իրավունքներին, կարողանան կանգնել պետության ու իշխանության կողքին և կարողանան տեսնել ու գնահատել այն քայլերը, որոնք իրականացնում է պետությունը»,- հավելեց Մարգարիտ Եսայանը:
Ավելին՝ տեսանյութում: