«Կենտրոն մաքրության» աշխատակիցները այսօր կրկին բողոքի ակցիա էին կազմակերպել նախագահական նստավայրի դիմաց: Եթե նախորդ անգամ արդեն իսկ լուծարված «Կենտրոն մաքրության» աշխատակիցները պահանջում էին իրենց վերջին ամսվա աշխատավարձն ու վերջնահաշվարկ, այսօր արդեն նոր լիբանանյան աղբահան օպերատորի մոտ աշխատանքի ընդունվածները պահանջում էին բարձրացնել աշխատավարձերը և հեռացնել այս նոր օպերատորին, քանի որ այն ստիպում է իրենց «ստրկական» պայմաններում աշխատել:
«Համ նախկինի համեմատ՝ քիչ է վճարում, համ ստիպում է, որ բանվորություն անենք՝ մեր մաքրածը հեռացնենք, համ աշխատանքային պայմանագիր չի կնքում մեզ հետ: Ով էլ բողոքում է, այդ արաբը ասում է՝ «ֆինիշ», իբր՝ ռադ եղեք: Մենք պահանջում ենք, որ մեր փողերը բարձրացված տա, ու ինքը թողնի-գնա մեր քաղաքից: Մենք մեր նախկին «Կենտրոն մաքրություն»-ն ենք ուզում»,- «Առաջին լրատվական»-ի հետ զրույցում ասաց ակցիայի մասնակիցներից մեկը:
Ակցիայի մասնակիցների խոսքով՝ նախկինում իրենք միայն ավլում էին փողոցները, իսկ աղբը հեռացնում էր բանվորը: Իսկ հիմա իրենց ստիպում են և՛ ավլել, և՛ աղբը հեռացնել ու ստանալ ավելի քիչ, քան նախկինում:
Բացի այդ, աշխատակիցների խոսքով՝ լիբանանյան օպերատորը նախապատվությունը տալիս է մարզային աշխատողներին, որոնց ավելի քիչ է վարձատրում:
«Չարենցավանցիներին բերել լցրել է ընկերությունում: Ինչի՞, մենք ի՞նչ պակաս էինք մաքրում: Գիշերը սկի մարդը մի բաժակ ջուր ուզի՝ կինը չի տա, բայց մենք՝ կանայքս, ամբողջ գիշեր փողոցներն ենք ավլում, որ առավոտյան մաքուր լինի»,- դժգոհեց մեկ ուրիշը:
Աշխատակիցների խոսքով՝ քաղաքապետարանին ուղղված իրենց բողոքներն արդեն անարձագանք են մնում, քանի որ «Սանիտեկ»-ից պատասխանում են, որ իրենք մասնավոր ընկերություն են ու քաղաքապետարանին չեն ենթարկվում: