Թալինի Դավիթաշեն գյուղի բնակիչ, բոլոր ժամանակների ընդդիմադիր Տիգրան Խամոյանն այս տարի Նոր տարին դիմավորում է առանձնակի ուրախությամբ: Պատճառն այն է, որ Ամանորից մի քանի օր առաջ բանակից զորացրվել է նրա 3-րդ որդին: Ոգևորված է: Վերջապես ամբողջ ընտանիքով սեղան կնստեն ու փառք կտան Աստծուն, որ որդին ողջ-առողջ վերադարձել է տուն:
Տիգրանի ամանորյա բարեմաղթանքն էլ է նույնը, որ բոլոր զինվորները խաղաղությամբ ծառայեն ու տուն վերադառնան, որ բոլորի ընտանիքներում էլ նույն ուրախությունը լինի, ինչ իրենը: Այդ ուրախության համար Տիգրանը նույնիսկ գառ էր մորթել, որը քերթելու ժամանակ անկեղծացավ ու պատմեց, որ ինքը գյուղի թվով 7 ընդդիմադիրներից մեկն է, որի անունը գրանցված է իրավապահ մարմինների մոտ: Ժամանակին հանրահավաքներին մասնակցելու համար նրան կանչել ու զգուշացրել են, նույնիսկ սպառնացել, որ հետ կանգնի այդ ճանապարհից, զգուշացրել են, որ որդին Ղարաբաղ «կընկնի» և այլն, բայց Տիգրանը ընդդիմադիր լինելու հարցում շատ համառ է:
Հիշում է, որ 88-ի շարժման ժամանակ ԱԺ-ի դարպասներին էլ նկար ունի, նաև 2008-ի հանրահավաքների ակտիվ մասնակիցներից է: Նույնիսկ այս տարվա եռյակի հանրահավաքներին է պարտադիր գալիս և այն հազվագյուտ մարդկանցից է, որ հավատում է, թե եռյակը կարող է իշխանափոխություն իրականացնել Հայաստանում: Բայց միևնույն ժամանակ հավատացած է, թե Ծառուկյանի «խաղերը վերևից են գալիս՝ Ռուսաստանից. Պուտինի խաղերն են»:
Դավթաշենցի Տիգրանի հետ մեր զրույցի մանրամասները՝ տեսանյութում:
