«Հայաստանի քաղաքական համակարգն այնպիսին է, որ հույսեր ունենալ, թե հաջորդ տարի ինչ-որ դրական փոփոխություններ կլինեն մարդու իրավունքների և ժողովրդավարության ոլորտում, մոլորություն է: 2015-ին մեծ սպասելիքներ հնարավոր չէ ունենալ»,- «Առաջին լրատվական»-ի հետ զրույցում, ամփոփելով 2014 թվականը, ասաց իրավապաշտպան Ավետիք Իշխանյանը:
Վերջինիս խոսքով՝ Հայաստանում մարդու իրավունքների խախտումները համակարգված բնույթ են կրում, բայց հատկապես զանգվածային են դառնում ընտրությունների ժամանակ, երբ իշխանությունը պահելու խնդիր է առաջանում:
Իշխանյանի խոսքով՝ 2014 թվականին մարդու իրավունքների խախտման ամենացցուն դեպքերից մեկը Սուրիկ Խաչատրյանի վերանշանակումն էր Սյունիքի մարզպետի պաշտոնում: «Այդ նշանակմամբ ՀՀ իշխանությունները ցույց տվեցին, որ իրենց համար բացարձակապես արժեք չեն մարդու իրավունքները»,- ասաց Իշխանյանը:
Իրավապաշտպանի համար հաջորդ ցցուն դեպքը Շանթ Հարությունյանի և ընկերների գործն էր, որով դատավճիռը քաղաքական պատվեր էր: Ուշագրավ էին նաև ակտիվիստների և քաղաքական գործիչների նկատմամբ բռնությունները ու մեքենաների հրկիզումը, որը համակարգված ահաբեկչություն էր՝ ուղղորդվող մեկ կենտրոնից:
Իրավապաշտպանը վիճակը անփոփոխ է համարում նաև բանակում, ոստիկանությունում, որտեղ շարունակում են մարդկանցից ցուցմունքներ կորզել խոշտանգումների ճանապարհով. «Առանձնապես դրական տեղաշարժեր չկան մարդու իրավունքների պաշտպանության հարցում: Պատկերը նույնն է»:
Իշխանյանի խոսքով՝ կանխատեսումներ կան, որ ԵՏՄ-ին միանալուց հետո այս պատկերը կարող է ավելի վատանալ, քանի որ այդ միության անդամ երկրներում մարդու իրավունքների պաշտպանության և ժողովրդավարության մակարդակը, մեղմ ասած, այնքան էլ մխիթարական չէ:
Առավել մանրամասն՝ տեսանյութում: