Թալինի Շղարշիկ գյուղում բնակվող Կոմիտաս Ասլանյանն այս տարի Նոր տարին դիմավորում է արդեն իր 9-րդ որդու հետ: Կոմիտասը 8 որդի ունի և մեկ դուստր: Պապն էլ՝ Աքրիվազ Ասլանյանը, իր հերթին է հպարտանում՝ 23 թոռ ունի ու 3 ծոռ: Դժվա՞ր է գյուղում այսպիսի բազմազավակ ընտանիք պահելը հարցին պատասխանում է. «Փառք Աստծո, ապրում ենք էլի: Անասուն ենք պահում ու ապրում ենք: Ոչ մի տեղ էլ չենք գնա: Սա իմ ծննդավայրն է, այստեղին կապված ենք արմատներով»,- ասում է Աքրիվազ պապին: Նա ընդամենը մի երազանք ունի՝ տեսնել Արևմտյան Հայաստանը ու նոր մեռնել: Մնացած ամեն ինչից գոհ է:
Աքրիվազ պապի 80-ամյա տիկինը ևս գոհ է իր կյանքից, հարսից, թոռներից: Նա առանձնակի ոգևորությամբ է սպասում Նոր տարուն: Պատրաստում է ավանդական գաթաներ, խմորեղեններ, գառ են մորթում: «Ամեն ինչ էլ անում ենք, ամեն բան էլ պատրաստում ենք: Կոմիտասի պես տղա ունեմ, է՜»,- հպարտանում է տատին:
Աքրիվազ պապը Արևմտյան Հայաստան մեկնելուց բացի ցանկանում է, որ իր թոռները լավ սովորեն, մասնագիտութուն ունենան ու գնան քաղաքում ապրեն: «Սարի գլուխ բան չկա: Մենք անասուն պահելով ապրում ենք, բայց իրենք թող ուսում ստանան»,- ասում է նա:
Այս բազմազավակ ընտանիքի մասին, սակայն, գյուղում, Թալինում կամ մարզում ոչ ոք չի հիշում: Բացի նպաստից, որևէ այլ օգնություն չունեն: Նպաստն էլ ոչ մի բանի չի բավարարում: Բայց մեկ է՝ երեխաները Ամանորի գիշերն անհամբեր սպասելու են Ձմեռ պապիկին, որը նրանց պետք է ավտոմեքենա բերի, նետ, հեքիաթի գրքեր ու էլի բազմաթիվ նվերներ:
Գուցե այս երեխաների ամանորյա երազանքը հենց մեր կառավարությո՞ւնն իրականացնի: