ԱՄՆ-ում բնակվող երգիչ Կարեն Բոքսյանի համար 2014-ը ակտիվ տարի էր: Նոր տարվա երեկոյից սկսած մինչև Հայաստանում համերգը՝ Մայրության և գեղեցկության տոնին նվիրված, ինչպես նաև երեք տեսահոլովակի նկարահանում: 2015-ին, երգչի խոսքով, կշարունակվի այս աշխատանքը:
– Կարեն, տարվա ընթացքում մի քանի անգամ գալիս եք Հայաստան: Հասցնո՞ւմ եք հետևել Հայաստանում տեղի ունեցող անցուդարձին:
– Ի դեպ, այս տարի վեց անգամ Հայաստանում եմ եղել և իհարկե հետևում եմ ու բավականին ակտիվ եմ: Ինչով կարող եմ՝ ձեռք մեկնել և օգտակար լինել ԱՄՆ-ից թե՛ բարեգործական միջոցառումների հետ կապված: Ի դեպ, Լոս Անջելեսում հունվարի 30-ին մեծ միջոցառում տեղի կունենա, որին ես և իմ կոլեգաները կմասնակցենք: Միջոցառման ամբողջ հասույթը ուղարկելու ենք Հայաստանի մանկատներ:
Կոնկրետ Հայաստանի հետ կապված՝ ուզում եմ մեկ րոպե շուտ թե՛ առօրյայում, թե՛ քաղաքականության հետ կապված ժողովրդին ձեռք մեկնեն:
– Ո՞ր խնդիրները, ըստ Ձեզ, առաջնային լուծման կարիք ունեն, որ խոչընդոտում են Հայաստանի զարգացմանը:
– Իմ կարծիքով՝ ամենակարևոր խնդիրը աշխատատեղերն են: Պետք է ժողովրդին ապահովել աշխատանքով, առավելագույն ինչ հնարավորություն որ կա. սեփական բիզնեսի թե պետական գործարանների շահագործման միջոցով, որոնք տարիներ շարունակ չեն աշխատել: Պետք է ինչ-որ կերպ ժողովրդին ձեռք մեկնել, և մարդկանց աշխատավարձի չափը, որքան հնարավոր է, բարձրանա:
Ամեն մարդ, ով արթնանում և շտապում է աշխատանքի, պետք է ուրախ գնա: Հայաստանում ապրող ժողովրդին պետք է աշխատատեղերով ապահովել, որովհետև յուրաքանչյուր հայ, որտեղ էլ որ լինի, աշխարհի որ մի երկրում էլ լինի, ինքն իրենը կստեղծի: Սա ապացուցված է, սրա մասին կարող ենք անգամ չխոսել: Մնում է՝ ժողովրդին պայմաններով ապահովել, և ամեն ինչ առաջ կգնա:
– Հայաստանո՞ւմ է հեշտ կայանալը, թե՞ դրսում, և արդյոք միայն հայկական համայնքի համար կայանալը բավարա՞ր է երգչին, և մեծ բեմեր նվաճելու ճանապարհները շա՞տ բարդ են:
– Գիտեք, թե՛ Հայաստանում, թե՛ ԱՄՆ-ում, կամ այլ երկրում հեշտ բան չկա: Այնպես չէ, որ եթե ԱՄՆ-ում ես ապրում, ավելի հեշտ է: Մանավանդ շոու բիզնեսը շատ բարդ խոհանոց է, որտեղ ամեն քայլդ քեզ կարող է կա՛մ ավելի բարձրացնել, կա՛մ խորտակել: Դրա համար դու այնքան ուշադիր պետք է լինես քո ամեն մի քայլի հանդեպ: Ինքս իմ փորձով կարող եմ ասել, որ ես զրոյից եմ սկսել նույն Միացյալ Նահանգներում իմ՝ երգչի կարիերան: Քարը քարի վրա դնելով՝ արդեն 15 տարի է՝ երգում եմ և ձայնագրում իմ ձայնասկավառակները, տեսահոլովակները, համերգները:
Մի խոսքով, չհամեմատենք, թե որտեղ է հեշտ՝ ԱՄՆ-ո՞ւմ, թե՞ Հայաստանում: Որոշ բաներ կան՝ այստեղ են ավելի հեշտ, իսկ որոշ բաներ էլ Հայաստանում են ավելի մատչելի: Իմ կարծիքով՝ Հայաստանում ավելի հեշտ է տեսահոլովակ նկարել և արդյունք ստանալ ավելի փոքր գումարով: Այսինքն՝ այն արդյունքը, որը կարող ես ստանալ Հայաստանում, ավելի շատ գումարներ ծախսելու դեպքում կարող ես ստանալ ԱՄՆ-ում:
Քանի որ իմ չորս ձայնասկավառակները ռուսերեն եմ ձայնագրել, ես ոչ միայն այստեղ հայ համայնքի համար եմ աշխատում, այլ նաև ռուսախոս հայ համայնքի համար՝ թե՛ Կալիֆոռնիայում, թե՛ Կալիֆոռնիայից դուրս: Օրինակ՝ ինչպես 2014-ի փետրվարին, 2015-ի փետրվարին էլ Սիրահարների տոնին մենք պետք է ելույթ ունենանք Նյու Յորքում: 2015-ին կրկին Նյու Յորք քաղաքում, Բոստոնում և Մայամիում տեղի կունենա իմ մենահամերգը:
-2015-ին ի՞նչ ցանկություններ ունեք:
-Ամենակարևորը՝ ես իմ մոտիկներին, իմ հարազատներին, իմ ընկերներին և երկրպագուներին միշտ մի բան եմ ցանկանում. Ամեն մարդ թող առողջլինի, հիմքը դա է: Երբ մարդ առողջ է, եթե շատ ձգտում ունի, ինչ-որ բաների կարող է հասնել: Միշտ բոլորին ցանկանում եմ՝ առողջ լինեն: Հաջորդը. օրը երբ բացվում է,ամեմ մարդ պետք է պոզիտիվ նայի: Հավատացեք, այդ դեպքում շատ ավելի դռներ կբացվեն և շատ ավելի բաների կհասնես: Ինչքան կարող ես՝ պոզիտիվ մտածի, եթե անգամ ինչ-որ բան չի ստացվում: Պոզիտիվ նայեք, այդ դեպքում, հավատացեք, շատ բաների կհասնեք, քան երբ շատ եք խորանում, դեպրեսիայի մեջ գցում. դրանով ոչ մի տեղ չեք հասնի:
2015-ին բոլորին ցանկանում եմ առողջություն, ուրախություն: Պոզիտիվ մտածեք և ձգտեքու կտեսնեք, որ ամեն ինչ լավ կլինի: