«Կախված նրանից, թե ինչ ապրանք և ինչ գործակիցներ են վերցվում, կարող են ստանալ բազմաթիվ թվեր, և կարող են ապացուցել, որ Հայաստանում գնաճը տարեկան 0,1 տոկոս է, կամ էլ 99 տոկոս»,- անդրադառնալով գնաճի վերաբերյալ ներկայացվող թվերին՝ կարծիք հայտնեց կառավարման փորձագետ Հարություն Մեսրոպյանը:
Մեսրոպյանի դիտարկմամբ, Հայաստանում գնաճն առնվազն 25 տոկոս է կազմում` պաշտոնապես հայտարարված 12.4-ի փոխարեն: Այս դիտարկումը փորձագետը հիմնավորեց այն հանգամանքով, որ անապահով խավերը ծախսում են երկու ուղղությամբ` միայն սննդամթերք գնելու, այն էլ՝ շատ նեղ շրջանակի, որոնց գներն ավելի արագ են բարձրանում, և կոմունալ ծառայությունների դիմաց վճարելու համար:
Մեսրոպյանը հիշեցրեց, որ Համաշխարհային բանկի տվյալներով, 2010 թ. Հայաստանում աղքատության շեմը կազմում է 34.1 տոկոս, և ընդգծեց. «Սա նշանակում է, որ 1.1 միլիոն մարդ Հայաստանում ծախսում է կոմունալ ծախսերի և նեղ շրջանակի սննդամթերքների վրա, որտեղ էլ գնաճը կազմել է 18.8 տոկոս»:
Մեսրոպյանը ընդգծեց, որ ԱՎԾ-ի դիտարկած ապրանքատեսակների միայն 10 տոկոսից են օգտվում 1.1 միլիոն աղքատ մարդիկ, ինչն էլ նշանակում է, որ գնաճը ներկայացված տվյալներից երկու անգամ մեծ է: