ԱՎԾ գների վիճակագրության և միջազգային համադրումների բաժնի պետ Գուրգեն Մարտիրոսյանը այսօր լրագրողներին ներկայացրեց 2011 թ. առաջին եռամսյակի գնաճի տեմպերը: Նա նշեց, որ 2011 թ. մարտին փետրվարի նկատմամբ արձանագրվել է 0.8 տոկոս գնաճ, այդ թվում` պարենային ապրանքների գները աճել են 0.9, ոչ պարենայինները` 0.5 տոկոսով. իսկ ծառայությունների սակագների աճը կազմել է 0.9 տոկոս:
ԱՎԾ տվյալներով, մեկ տարվա կտրվածքով` 2010 թ. մարտի նկատմամբ, հանրապետությունում գնաճը կազմել է 11.5 տոկոս: Պարենային ապրանքների գները աճել են 17.5, ոչ պարենային ապրանքներինը` 3.8, իսկ ծառայությունների սակագները աճել են 8.4 տոկոսով:
Մարտիրոսյանը նաև տեղեկացրեց, որ այս տարվա երեք ամիսների գնաճը` 2010 թ. դեկտեմբերի նկատմամբ, 2011 թ. մարտին կազմել է 5.2 տոկոս:
ԱՎԾ ներկայացուցիչը նաև նշեց այն բնակավայրերը, որտեղ արձանագրվել են ամենաբարձր և ամենացածր գնաճը. «Վերջին մեկ ամսում Հանրապետության դիտարկվող բնակավայրերում գնաճը տարաբնույթ է եղել` այն կազմել է 0,2-ից մինչև 2,7 տոկոս: Ամենացածր գնաճն արձանագրվել է Գյումրի քաղաքում. ամենաբարձրը` Եղեգնաձորում: Երևանում գնաճը կազմել է 1 տոկոս»:
Կառավարման փորձագետ Հարություն Մեսրոպյանը, անդրադառնալով ներկայացված թվերին, ասաց, որ տարեկան կտրվածքով այս երեք ամսվա գնաճն անցնում է 10 տոկոսից, այսինքն՝ արդեն իսկ այս տարվա գնաճն ավելի մեծ է, քան անցած տարվա տարեկան գնաճը:
Ներկայացնելով տարածաշրջանի տվյալները, Մեսրոպյանը նշեց, որ ԱՊՀ երկրներում ամենաբարձր գնաճը ունենում են Հայաստանը, Ղրղզստանը և Ռուսաստանը, ընդ որում՝ հունվարին Հայաստանն առաջին տեղն էր զբաղեցրել: Ամենացածր գնաճը ԱՊՀ տարածքում, Մեսրոպյանի խոսքերով, արձանագրվում է Ուկրաինայում, Մոլդովայում և Ադրբեջանում: Ընդ որում հունվարին Ադրբեջանն ամենացածր գնաճն է արձանագրել` 0,8 տոկոս:
Մեսրոպյանը նկատեց, որ վարչապետի ենթադրություններով տարեկան սղաճը լինելու է 6 տոկոս, Եվրոպական զարգացման բանկը կրկնում է բյուջեում գրված թիվը 4+-1,5, Միջազգային արժութային հիմնադրամն էլ կանխատեսում է 4,6 տոկոս: Նա հիշեցրեց, որ այդ սպասումները համընկնում են անցյալ տարվա սպասումներին և ինչպես անցյալ տարի, այժմ էլ է ասվում, որ տարվա երկրորդ կեսից գնաճի տեմպերը կնվազեն: Փորձագետի համար այդ կանխատեսումները հետաքրքրական էին, քանզի դրանցով առաջնորդվելով կարելի է կարծել, որ տարվա երկրորդ կեսին դեֆլյացիա է լինելու, ինչը, ըստ նրա, անհնար է՝ հաշվի առնելով արդեն իսկ արձանագրված թվերը: