Այսօր ԵԱՀԿ դիտորդական առաքելությունը հայտարարություն է տարածել Ղազախստանում երեկ կայացած ընտրությունների վերաբերյալ, որոնք անվանել ժողովրդավարական չափանիշներին չհամապատասխանող: Մամլո հաղորդագրությունում ասվում է, որ այս ընտրություններում արձանագրված խախտումները նկատվել են նաև նախորդ ընտրությունների ժամանակ: Այս մասին հաղորդում է Interfax գործակալությունը:
ԵԱՀԿ-ում նշել են, որ տեխնիակակն տեսակետից ընտրությունները լավ էին կազմակերպված, սակայն ընդդիմությունը չի կարողացել պատշաճ կերպով իրականացնել քարոզչությունը: Ցուցակներում հայտնված թեկնածուները չեն ձգտել իրական մրցակցության մեջ մտնել Նուրսուլթան Նազարբաևի հետ, իսկ ընտրությունների ողջ գործընթացը թափանցիկ չի եղել:
Արձանագրվել են նաև քվեարթերթիկների լցոնման, միջազգային դիտորդների աշխատանքները սահմանափակելու դեպքեր: «Ընտրություններն այն մակարդակին չէին, որը մենք սպասում էինք»,- ասել է Ղազախստանում ԵԱՀԿ ներկայացուցիչ Դաան Էվերտը:
Եվրոպայի խորհրդի Խորհրդարանական վեհաժողովի դիտորդական խումբը նշել է, որ ղազախստանյան ընտրություններն արտացոլում են երկրի ժողովրդի կամարտահայտությունը: Պատվիրակության ղեկավար Յուլիա Լյովոչկինայի խոսքերով, Ղազախստանում որոշակի առաջընթաց նկատվում է: Ի տարբերություն եվրոպացիների, ԱՊՀ դիտորդները Ղազախստանի ընտրությունները գնահատել են որպես թափանցիկ և բաց:
Հիշեցնենք, որ Ղազախստանում ապրիլի 3-ին տեղի են ունեցել նախագահական ընտրություններ, որի արդյունքում հաղթանակ է տարել գործող նախագահ Նուրսուլթան Նազարբաևը` ստանալով ձայների 95.5%-ը: Ընտրություններին մասնակցել է քվեարկողների 85%-ը:
